«Катта еттилик» Россиядан нефть нархини назорат қилиш учун картел ташкил қилмоқчи 

«Катта еттилик» (G7) мамлакатлари Россия нефтининг жаҳон бозорларида потенциал нарх чегарасини аниқлаш учун Россия нефти харидорлари картелини яратиш зарур деб ҳисобламоқда. Бу ҳақда 19 май, пайшанба куни АҚШ молия вазири Жанет Йелленга таяниб, The Wall Street Journal нашри хабар берди.

АҚШ Молия вазирлиги раҳбарининг фикрича, Россия нефтига потенциал нарх чегараси харидорлар картели томонидан белгиланиши мумкин. «Бу муҳим картелни талаб қилади, эҳтимол, фақатгина Европа иттифоқи бунда етарли бўлмайди», деди у. 

Хитой ёки Ҳиндистон каби давлатлар Россия нефтини қандай сотиб олишини аниқлаш механизмини яратиш АҚШ ва унинг иттифоқчиларининг Россиянинг Украинадаги ҳарбий ҳаракатларига жавобан Россия иқтисодиётини заифлаштиришга қаратилган саъй-ҳаракатларида янги қадам бўлади. 

Йелленнинг сўзларига кўра, ғарб давлатлари жаҳон иқтисодиётига ортиқча оғирлик солмасдан, Россиянинг энергия ташувчилардан даромадларини камайтириш йўлини изламоқда. «Мақсад - ҳаддан ташқари салбий таъсирнинг олдини олиш учун жаҳон нархларини ушлаб туришда бозорга Россия нефтининг оз ҳажмдаги оқимини киритиш», деди АҚШ молия вазири. 

Шу билан бирга, унинг сўзларига кўра, бундай лойиҳаларни муҳокама қилиш ҳали жуда эрта босқичда турибди. «Менимча, кўпчилик, жумладан, ўзим ҳам буни умумий иқтисодий нуқтаи назардан жозибадор деб ҳисоблайман. Аслида бундай механизмни ишга тушириш жуда қийин ва бу масалаларнинг барчаси ҳали ишлаб чиқилмаган», - деди Йеллен. 

Bloomberg маълумотларига кўра, йил бошидан бери Россиянинг нефть даромадлари 50 фоизга ошган. 

The Wall Street Journal таъкидлашича, Германияда бўлиб ўтган G7 молия вазирлари учрашувида Россия нефти нархига эҳтимолий чекловни қўллаш усули сифатида иккиламчи санкцияларни киритиш имконияти ҳам муҳокама қилинган. 

«Санкциялар, иккиламчи санкциялардан фойдаланиш ғояси пайдо бўлди. Нархларни чеклаш ўрнига тарифлар ғояси муқобил ёндашув бўлиши мумкин», деди АҚШ молия вазири.