"Украинадаги азоб-уқубатларни бас қилинг!": Германия президенти Путинга мурожаат қилди

Германия президенти Франк-Валтер Штайнмайер Владимир Путинни Украинадан қўшинларни зудлик билан олиб чиқиб кетишга чақирди.

"Украина суверенитетини ҳурмат қилинг, жанговар ҳаракатларни тўхтатинг", - деди Штайнмайер.

"Жаноб Путин, Украинадаги азоб-уқубатлар ва бузғунчиликларни бас қилинг! Қўшинларингизни олиб чиқиб кетинг! Президент Зеленский билан тўғридан тўғри ва жиддий музокаралардан бош тортманг!", - дея мурожаат қилди у Россия президентига.

Штайнмайер шунингдек, "Путиннинг тажовузкор уруши фақат Украинадаги одамларгагина таъсир қилмаётгани"га эътибор қаратди.

"Яқин ойларда дунёнинг кўплаб ҳудудларига, айниқса, Шарқий ва Жанубий Африкага очарчилик ва ўлимлар таҳдид солади", - деди у.

Германия президенти "Путин урушининг оқибатлари ҳали коронавирус пандемиясидан тикланишга улгурмаган давлатлар ва иқлим инқирози сабабли қурғоқчиликка дуч келган ҳудудларга зарба бериши"ни таъкидлади.