Эрон Грециянинг икки кемасини ушлади

Апрел ўрталарида Греция Россия байроғи остида Эрон нефтини олиб кетаётган Lana танкерини ушлаганди.

Фото: Getty Images

Эрон ислом инқилоби қўриқчилари корпуси кучлари Форс кўрфазида Грециянинг икки танкерини ушлади. Бу ҳақда IRNA агентлиги хабар берди.

Хабар қилинишича, Эрон ҳарбий-денгиз кучлари вертолёти Форс кўрфазида Греция байроғи остида сузаётган Delta Poseidon кемаси бортига қўнган. Сўнгра кема экипажи, жумладан, икки нафар грециялик фуқаро қўлга олинган. Эрон соҳили яқинида сузаётган Prudent Warrior грек кемаси билан ҳам худди шу ҳолат юз берган.

Греция ташқи ишлар вазирлиги Эроннинг бу ҳаракатини кескин қоралади.

Аввалроқ Nournews агентлиги Эрон ҳукумати Эрон нефтини олиб кетаётган танкер Греция томонидан ушлангани сабабли жавоб "жазо чоралари"ни кўришга қарор қилгани ҳақида хабар берганди.

Апрел ўрталарида Грецияда Россия байроғи остида Эрон нефтини олиб кетаётган Lana танкери ушланганди. Хабарларга кўра, Афина нефтни АҚШга беришга қарор қилган.