Харков марказига яна ракета ҳужуми, Северодонецкка артиллерия зарбалари. Уруш суратлари

Украинада урушнинг 92-куни ўтди. Донбасс учун жанглар давом этмоқда — Киевдаги расмий шахсларнинг бу ҳудуддаги вазият бўйича баёнотлари тобора хавотирли тус олмоқда. 26 май куни Харков области ўққа тутилди, регион расмийлари 9 киши ҳалок бўлганини хабар қилди, қурбонлар орасида — беш ойлик чақалоқ ҳам бор. Россия кучлари томонидан эгаллаб олинган, кўп вақтдан буён электр таъминоти ва ахборот олиш имкони йўқ бўлган Мариупол кўчаларида Россия телеканаллари намойиш этиладиган ҳаракатланувчи экранлар пайдо бўлди.

Финландия бош вазири Санна Марин Киевга келиб, Украина президенти Володимир Зеленский билан учрашди
Ukrainian Presidential Press Office via AP)

Украинада урушнинг 93-куни. Сўнгги маълумотлар

Россия ҳарбийлари Луганск области маъмурий маркази бўлмиш Северодонецк шаҳрини қуршовга олиш учун ҳаракатларини давом эттирмоқда. Шаҳар атрофида фавқулодда оғир жанглар кетмоқда.
Регион раҳбарининг маълумотига кўра, Луганск областининг фақат 5 фоиз ҳудуди Украина қўлида қолган - бу бир ҳафта олдингидан икки баробар камроқ. Украина қўшини фронтнинг айрим участкаларида чекинишга мажбур бўлмоқда.
Северодонецк мэри шаҳар тинимсиз ўққа тутилаётгани, шаҳардаги турар жой биноларининг 60 фоизи вайрон бўлгани, қурилишларнинг 90 фоизга яқини шикастлангани ва уларни капитал таъмирлаш талаб этилишини айтган.
Пентагондагилар ҳарбийлар сони бўйича катта устунликка эгалигига қарамай, Россиянинг ютуқлари камтаргина эканини айтишмоқда. Россия қўмондонлиги аввалги хатоларидан сабоқ чиқармай, ўша тактикадан фойдаланишда давом этмоқда.
Урушларни тадқиқ қилиш институти таҳлилчилари Россия армияси жиддий даражада кучсизлангани ва келгусидаги йўқотишлар ўрнини тўлдириш жуда қийин бўлишини айтишган. Ҳозирда, уларнинг маълумотига кўра, Россия Украина жанубида эгаллаб олинган ҳудудларда ҳудудлар устидан узоқ муддатли назорат ўрнатиш ва украинларнинг қарши ҳужумларини қайтариш учун «мудофаанинг учинчи линияси»ни ўрнатмоқда.
Украина ТИВ раҳбари яна бир бор Ғарб мамлакатларига мурожаат қилиб, агар улар Украина тақдирига бефарқ бўлишмаса, зудлик билан оғир қуроллар етказиб беришлари зарурлигини айтди: «Артиллериясиз, баравар ўт очиш реактив тизимларисиз, биз россияликлар қўшинини сиқиб чиқара олмаймиз».
CNN телекомпанияси шахсини сир тутган бир неча америкалик амалдорларга таяниб, Байден маъмурияти Украинага Киев сўраётган узоқ масофага отувчи илғор ракета тизимларини етказиб беришга тайёрланаётганини хабар қилди. Бундай жўнатма ҳақида кейинги ҳафтада эълон қилиниши кутилмоқда.

Қуйида 26 май куни Украинанинг турли ҳудудларида олинган фотосуратлар.

Донбасс шимоли