Савдо-саноат палатаси Dieffenbacher билан музокара ўтказди

Dieffenbacher – ёғоч-қириндидан плиталар (ДСП, МДФ, ОСП, LVL) ишлаб чиқариш линияларининг дунёдаги етакчи ишлаб чиқарувчиси бўлмиш корхона. Дунё бўйлаб кўплаб корхоналар ўз фаолиятини режалаштиришда, жиҳозлашда ва модернизация қилишда айнан Dieffenbacher'га суянади. CPS+ ёрдамида Dieffenbacher узлуксиз пресслашнинг олтин стандартини ўрнатди.

Давлат раҳбари жорий йил 12-13 май кунлари Фарғона вилоятига ташрифи давомида Бувайда туманидаги эшик-ром ва дурадгорчилик маҳсулотлари ишлаб чиқариш корхонасини кўздан кечирганда берган топшириқлари юзасидан Ўзбекистон Республикасининг Германия Федератив Республикасидаги элчихонаси кўмагида Савдо-саноат палатаси вакиллари томонидан Германиядаги соҳа тадбиркорлари билан ҳамкорлик алоқаларини ўрнатиш масаласи кўриб чиқилди.

Германиянинг Эппинген шаҳрида фаолият юритувчи ёғоч-қириндидан ясаладиган маҳсулотларни пресловчи ускуналар ишлаб чиқаришга ихтисослашган йирик Dieffenbacher корхонаси вакиллари билан ҳам учрашувлар ташкил қилинди.

Dieffenbacher ўз соҳасида етакчи технология ишлаб чиқарувчи корхона бўлиб, ишлаб чиқарадиган ускуналари ва кўрсатадиган хизматларининг 70 фоизидан ортиғи экспорт қилинади.

Ушбу компания вакиллари билан дастлабки музокараларда компания технологик ускуналарини Ўзбекистон бозорига олиб кириш, мамлакатимиздаги дурадгорлик маҳсулотлари ишлаб чиқарувчиларнинг иккиламчи маҳсулотларидан ушбу компания ускуналари ёрдамида прессланган бошқа маҳсулотлар ҳам ишлаб чиқариш имкониятлари муҳокама қилинди.

Шунингдек, келгусида компания вакиллари билан Ўзбекистондаги ушбу технологияларга бўлган талабни чуқур ўрганиб, таҳлил қилган ҳолда ҳамкорликни йўлга қўйиш масалалари келишиб олинди.

Савдо-саноат палатаси матбуот хизмати (T)