“Қурувчи таннархидан эмас, бюджетга тўлайдиган солиғидан чегирма қилиб беряпти” – ССП раиси

Савдо-саноат палатаси раиси Даврон Ваҳобовга кўра, бугунги кунда тадбиркорларнинг ўзлари рақобатнинг тенг шартларини ва бизнес юритишнинг шаффоф механизмларини яратиш ташаббуси билан чиқяпти.

«Улар хуфиёна ишлайдиган тадбиркорлик субъектлари қонуний ишлайдиган тадбиркорларга тенг рақобат қилмаётганини таъкидлаяпти. Шу сабабли қонуний ишлайдиган тадбиркорлик субъектлари тарафидан қонуний ишламайдиган тадбиркорларга чораларни кучайтириш таклифлари бериляпти», – деди у «Ўзбекистон 24» телеканалига берган интервюсида.

Ваҳобов қурилиш соҳасидан мисол келтириб ўтди: «Бетонли домларимизнинг бир квадрати 4 миллион 600 минг сўм (ернинг нархини қўшмаганда). Ғиштли домларимизнинг нархи 5,5−6 миллион сўм. Тадбиркор эртага қайсидир мижозга шу уйни сотадиган бўлса, у давлатга тўланмаган солиқ натижасида уйнинг нархини имтиёзли қилиб беряпти, яъни чегирма ўтиб беряпти. Лекин у маҳсулот таннархидан эмас, бюджетга тўлайдиган солиғидан чегирма қилиб беряпти».

ССП раиси сўзларига кўра, қишлоқ хўжалиги ва транспорт соҳасида ҳам хуфиёна иқтисодиёт жуда юқори даражада кузатилмоқда.

«Транспорт компаниясида 150 та транспорт улови бўладиган бўлса, фақат 15 киши расмийлаштирилган. Бундай компаниялар учун президент томонидан рағбатлантирувчи мезонларни кўпайтириш, уларга арзон айланма маблағ кредити ёки бошқа имтиёзлардан бериб, ишчи ўринларининг шаффоф кўрсатилишига эришиш бўйича аниқ йўналишлар берилди», – дея таъкидлади у.

Аввалроқ, 2028 йилгача республика бўйича босқичма-босқич кўчмас мулкнинг бозор қийматини аниқлаш тизимига ўтилиши хабар қилинганди. Шу асосда кўчмас мулк солиғи ставкалари ҳам пасайтириб борилади. Солиқ қўмитаси раиси Шерзод Қудбиев Тошкентда уй-жойнинг минимал қийматини белгилаш ва келгусида шу меъёрга риоя қилиш бўйича таклифлар ишлаб чиқишни таклиф қилганди. У пойтахтда уй-жойнинг 1 кв метр қиймати камида 500 доллар эканини таъкидлаб ўтганди.