400 бизнесмен бир даврада – Осиё, Араб ва Африкани боғловчи макон ишбилармонлари Тошкентда йиғилди

Тошкент халқаро инвестиция форуми доирасида Осиё, Араб, Африка мамлакатларини бир-бирига боғловчи муҳим иқтисодий маконда жойлашган давлатлар бизнес вакиллари бизнес форумда тўпланди. 400 дан ортиқ ишбилармонларни жамлаган форум B2B учрашувлар ва муҳим экспорт шартномаларига майдон бўлиши керак.

Афғонистон, Баҳрайн, Миср, Ироқ, Қатар, Кувайт, Малайзия, Уммон, Саудия Арабистони, Сурия ва БАА – бу давлатларнинг ҳар бири йилдан йилга Ўзбекистоннинг фаол савдо шерикларига айланмоқда. Бизнес вакиллари ва ўзбекистонлик экспортёрларни жамлаган ушбу форум экспорт ҳажмини ошириш, инвестицияларни жалб қилиш ҳамда ишбилармон доиралар ўртасида тўғридан тўғри мулоқот учун самарали майдон яратиши керак.

Форумда расмий делегатлар ҳам қатнашди. Масалан, Индонезия савдо вазири ўринбосарига кўра, бу давлат билан Ўзбекистоннинг савдо айланмаси бугун 181 млн АҚШ доллари. Икки давлат эркин савдо битими устида ишламоқда.

«Айни пайтда Ўзбекистонда фаолият юритаётган индонезиялик инвесторлар ва компаниялар бор. Айниқса, меҳмонхона ва туризм соҳасида уларнинг иштироки сезиларли. Биз нафақат иқтисодий, балки маданий ва диний жиҳатдан ҳам умумий қадриятларга эгамиз. Индонезия дунёдаги энг катта мусулмон аҳолига эга давлатлардан бири. Шу боис кўплаб индонезияликлар Имом Бухорийнинг Самарқанд яқинидаги зиёратгоҳларини зиёрат қилиш учун Ўзбекистонга келади. Бу эса туризм ва меҳмондўстлик соҳаларида ҳамкорлик учун катта имконият яратади. Савдо соҳасида ҳам ҳамкорлик изчил ривожланмоқда. Масалан, биз Ўзбекистондан минерал ўғитлар импорт қиламиз, ўз навбатида Индонезиядан қоғоз маҳсулотлари ва бошқа турли товарлар экспорт қилинади”, дейди Дях Роро Эсти Видя Путри.

Бизнес форумида хорижлик қатнашчилар Ўзбекистоннинг иқтисодий ислоҳотларидан ҳам бохабар қилинди.

-Сиз қайси йўналишда ишлайсиз ва бугунги мулоқотдан нималарни кутяпсиз?

- Биз тўқимачилик соҳасида фаолият юритамиз ҳамда Навбаҳор текстил кластери билан 3 йилдан буён самарали ҳамкорлик қилиб келмоқдамиз. Ҳозирги кунда логистика йўналишида айрим қийинчиликлар мавжуд, айниқса Осиё бозорларига маҳсулот етказиб бериш учун янги ечимларга эҳтиёж сезилмоқда. Шу билан бирга, ташқи бозорларга чиқиш имкониятларини янада кенгайтириш муҳим аҳамиятга эга. Ўзбекистоннинг тўқимачилик салоҳияти жуда юқори: мамлакатда сифатли пахта, замонавий технологиялар ва малакали кадрлар мавжуд. Шу боис, бу соҳанинг келажагига катта ишонч билан қараймиз. Биз сифатли пахта ва ишончли ишлаб чиқарувчилар билан ҳамкорлик қилиб, юқори сифатли ип-калава ҳамда мато маҳсулотлари ишлаб чиқаришга ҳисса қўшмоқдамиз, дейди малайзиялик ишбилармон Рамамурти.

Озиқ-овқат саноати, қишлоқ хўжалиги, тўқимачилик, фармацевтика, қурилиш материаллари, логистика, электрон тижорат ва туризм – бу давлатлар билан ҳамкорликнинг асосий приоритетлари бўлмоқда.

“Ўзбекистон эшитганимдан кўра бошқачароқ давлат экан. Биз бу ерда ростданам қила оладиган кўплаб лойиҳа ва имкониятларни кўряпмиз. Биз Ўзбекистон ва бу ердаги иқтидорли инсонлар билан узоқ муддатли, стратегик ҳамкорлик қилишни истаймиз. Ўзбекистонда жуда кучли салоҳият борлигини кўряпмиз. Биз шу салоҳиятга сармоя киритиш ва рақамли иқтисодиёт соҳасида халқаро миқёсда натижа берадиган лойиҳаларни биргаликда ривожлантиришни хоҳлаймиз. Ҳукумат ўз ишини жуда яхши олиб бормоқда. Масала талаб ёки шартларда эмас, балки қандай қилиб биргаликда ҳамкорлик қилишимиз мумкинлигидадир. Аввало, мамлакатнинг устувор йўналишларини аниқлаб олишимиз керак. Бизда кўплаб ғоялар ва ташаббуслар бор, аммо ишни айнан Ўзбекистон учун муҳим бўлган устувор вазифалардан бошлашни хоҳлаймиз. Шу асосда ҳамкорлигимизни йўлга қўямиз”, - дейди Қатарнинг МБК Ҳолдинг компанияси асосчиси ва раиси Шайх Мансур бин Халифа ол Соний.

Ўзбекистон Афғонистонни минтақавий иқтисодий жараёнларга фаол тортиб келади. Чунки Ўзбекистон учун иқтисодий жиҳатдан ривожланган Афғонистон муҳимроқ. Бизнес форумда афғон делегатларини ҳам кўриш мумкин.

«Биз Ўзбекистон яхши мамлакат эканини биламиз ва ҳукумат ҳам жуда яхши. Шунинг учун бу ерга келдик. Ўзбекистон компаниялари билан бизнес йўлга қўйишга ҳаракат қиляпмиз. Агар имконият бўлса, бу ерга инвестиция ҳам киритишимиз мумкин.

Бугун форумда бир нечта компаниялар билан учрашдик. Суҳбатлашдик ва эртага ҳам музокараларни давом эттириш режамиз бор. Балки айрим компаниялар билан бизнес ҳам бошланиши мумкин”, дейди афғон бизнесмени Ҳумоюн Гардезий.

Олтин саноати бўйича тадбиркорлардан бири ўз йўналишида Ўзбекистоннинг салоҳиятини юқори баҳолайди.

«Биз Ўзбекистонга тахминан ўн ой олдин келдик ва олтин бизнесидаги имкониятларни ўрганиб, бу ерга сармоя киритишга қарор қилдик. Ўзбекистон бизнес учун жуда қулай мамлакат. Ҳозирда Учтепа туманида Germ Gold компаниямиз фаолият юритмоқда ва асосан экспорт билан шуғулланяпмиз. Биз Ўзбекистондаги энг йирик брендлардан бирига айланишни мақсад қилганмиз. Бозор шароитлари яхши, бизнес юритишда ҳеч қандай муаммога дуч келмаяпмиз”, дейди туркиялик инвестор.

- Яна қандай аниқ режаларингиз бор?

-Компаниямиз маҳсулотлари бугунги кунда Форс кўрфази давлатлари ва Ҳонгконгга экспорт қилинмоқда. Яқин вақт ичида Туркия бозорига ҳам Ўзбекистондан маҳсулот етказиб беришни режалаштирганмиз. Туркияда ҳам фаолиятимиз мавжуд бўлиб, у ерда 16 та филиалимиз ишлайди.

-Олтиннинг сифати қандай, бизнинг халқ ўзбек олтини даражаси юқори деб айтади.

-Менинг фикримча, олтиннинг сифати ҳамма жойда бир хил. Асосий фарқ дизайн ва ишлаб чиқариш услубида. Бозор талаблари тез ўзгариб бораётгани учун биз доим янги намуналар устида ишлаймиз. Масалан, сўнгги беш ойда билагузуклар бўйича 300 дан ортиқ янги дизайн яратдик, дея қўшимча қилди туркиялик ишбилармон. 

Форум доирасидаги B2B учрашувлар янги шерик ва ҳамкорлар топиш, экспорт шартномалари ва қўшма инвестиция лойиҳалари юзасидан музокаралар олиб бориш имконини яратди.