Кубада 2021 йилги намойишда қатнашганлар 25 йилгача қамоқ жазосига ҳукм қилинди

Кубадаги оммавий норозилик намойишларидан 11 ой ўтиб, уларнинг 381 иштирокчисига суд ҳукми чиқарилди. Мамлакат бош прокуратурасининг 13 июнь, душанба куни берган маълумотига кўра, 297 киши қамоқ жазосига ҳукм қилинган, оммавий тартибсизликларга ундашда айбдор деб топилган 36 кишига нисбатан қамоқ муддати 5 йилдан 25 йилгача бўлади.

Намойишчиларга қўйилган бошқа айблар қаторида қўпорувчилик, талончилик, тан жароҳати етказиш, ҳокимиятга ҳурматсизлик ва жамоат тартибсизликларида қатнашиш бор. Шунингдек, 16 ёшдан 18 ёшгача бўлган 16 нафар ўсмир ҳам судланди. Уларнинг бир нафаридан бошқа ҳаммаси жамоат ишлари каби муқобил жазога ҳукм қилинган.

2021 йил 11 июлда Кубада социалистик ҳукуматга қарши кутилмаган норозилик намойишлари бошланди, бу сўнгги ўн йилликлардаги энг каттаси бўлди. Кўплаб шаҳарларда иштирокчилар вакциналардан тенг фойдаланишни талаб қилиб, нотўғри бошқарув ва ҳукуматнинг коронавирус пандемиясига қарши кураш сиёсатига қарши норозилик билдиришди. Фаолларга кўра, бу намойишлар натижасида 1400 га яқин одам қўлга олинган.

Март ойида олий суд 127 кишини тартибсизликларга ундаш ва ўғирликда айблаб, 6 йилдан 30 йилгача қамоқ жазосига ҳукм қилган эди. Европа иттифоқи Куба ҳукуматини «барча сиёсий маҳбуслар ва фақат тинч йиғилиш ҳамда сўз эркинлиги ҳуқуқидан фойдалангани учун ҳибсда сақланаётган шахсларни озод қилишга» чақирди.