Ҳар йилги анъана: ОТМга қабул яна кеч бошланади, квоталар ҳалигача аниқмас

Бугун, 15 июн куни ОТМларнинг бакалавриат босқичи учун онлайн қабул бошланиши керак эди. Лекин Давлат тест маркази жим: қабул бошланиши ҳақида хабар бергани йўқ. Сабаби – қабул квотасига оид қарор ҳали қабул қилинмаган, қарор қабул қилингандан кейин эса яна бир жараён – квота тиллар кесимида ва мақсадли қабул параметрлари тасдиқланиши керак.

Демак, олдинда ҳали 2 та жараён бор: квотага оид президент қарори ва ундан сўнг Таълим муассасаларига ўқишга қабул қилиш бўйича давлат комиссиясининг баёни тасдиқланиши керак.

Қачон тасдиқланиши мумкин?

Давлат тест марказидан олинган маълумотга кўра, ҳозирча квоталар қачон тасдиқланиши ва қабул қачондан бошланиши аниқ эмас.

Олий ва ўрта махсус таълим вазирлигининг Kun.uz'га берган маълумотига кўра эса, квоталар “яқин орада” тасдиқланиши кутилмоқда.

Бироқ ҳозирча қачон деган саволга жавоб йўқ. Лекин бир нарса аниқ: барибир кечикилди, белгиланган сана – бугундан қабул бошланмади.

Қонунчилик нима дейди

Ҳукумат қарори билан Олий таълим муассасаларига ўқишга кириш учун ҳужжатларни қабул қилиш бўйича давлат хизматларини кўрсатишнинг маъмурий регламенти тасдиқланган.

Мазкур регламентга кўра, ОТМларга бакалавриатга ҳужжат топшириш ҳар йили 15 июндан 15 июлгача амалга оширилиши керак.

Умуман олганда, ОТМларга қабул билан боғлиқ қонунчиликка аксар ҳолларда амал қилинмайди. Кириш имтиҳонларининг жавоблари ҳам кеч эълон қилиниши бунга мисол.

Бироқ...

Регламент муддатига қарамасдан қабул квоталари тасдиқланмади ва онлайн ҳужжат топшириш бошлангани йўқ. Ҳуқуқшунос-блогер Хушнудбек Худойбердиев бу ҳақда шундай ёзади:

“Демак, 2022 йил ҳам квоталар қабул бошлангандан кейин кечикиб тасдиқланган йил сифатида тарихга киради.

Умуман олганда, бу Ўзбекистон учун янгилик эмас. Бунақаси илгари ҳам кўп бўлган ва бу кетишда ҳали яна кўп бўлса керак. Узоққа бормаймиз, масалан, ўтган йили қабул квоталари 22 июнь куни тасдиқланганди. Яъни расман қабул бошланиши керак бўлган санадан 1 ҳафта кечроқ. Шу сабабли қабул муддати ҳам 22 июндан 22 июлга қадар деб узайтирилганди.

Жорий йилда ҳам квоталар кечикаётгани сабабли қабул муддатлари узайтирилса керак”.

Нималар кечикяпти?

Жорий йилдан 6 та ОТМда чет тили биринчи фан бўлган таълим йўналишларида ижодий имтиҳон олинади. Қабул квотасига оид президент қарори лойиҳасида бу таълим йўналишларида қабул бошқаларга қараганда эртароқ – 15 июндан 5 июлгача этиб белгиланиши қайд этилган. Ва уларда имтиҳон асосий тестдан олдинроқ ўтказилиши режа қилинган. Умумий қабулнинг кечикиши имтиҳонларни, ўз навбатида, ижодий имтиҳонларни кечиктириши мумкин.

Қолаверса, бу йил истисно тариқасида 5 йил стажга эга бўлган хотин-қизларга ажратиладиган 500 та квота учун тавсиянома олувчилар ҳам қабул бошланадиган кундан Оила ва хотин-қизлар давлат қўмитасининг ҳудудий бўлимларига мурожаат қилишлари керак. Қабул кечикса, бу жараён ҳам кечикиши эҳтимоли йўқ эмас.

Тайёргарлик учун қўшимча вақт

Амалдаги тартибга кўра, квоталар тасдиқланиши кечикаётган бўлса-да, абитуриентлар хавотирга тушмасдан тайёргарлик кўришда давом этишлари лозим. Қабул бошлангунча эса энг яхшиси – қайси касб танлашни яхшироқ ўйлаб олишларига ҳам яна бир бор вақт ажратишлари имкони бор.