Лондон “ДХР”да икки британияликнинг ўлимга ҳукм қилиниши муносабати билан Россияга нота йўллади

9 июн куни ўзини ўзи мустақил деб эълон қилган Донецк халқ республикаси суди британиялик Шон Пиннер ва Эйден Аслинга нисбатан ўлим жазоси ҳукмини чиқарганди.

Фото: РИА Новости

Буюк Британия ўзини ўзи мустақил деб эълон қилган Донецк халқ республикаси олий судининг британиялик Шон Пиннер ва Эйден Аслинни ўлим жазосига ҳукм қилгани муносабати билан Россияга нота йўллади. Бу ҳақда Россиянинг Лондондаги элчиси Андрей Келин маълум қилди.

«Улар нота йўллашди, аммо мутлақо такаббурларча ва ақл ўргатувчи оҳангда. Нота бу масалада ҳамкорлик қилиш хоҳишини уйғотмайди»,— деди у.

9 июн куни ўзини ўзи мустақил деб эълон қилган Донецк халқ республикаси суди британиялик Шон Пиннер ва Эйден Аслин, шунингдек Марокаш фуқароси Саадун Иброҳимни “ДХР”да ҳокимиятни куч билан эгаллаб олишга уриниш, террорчилик фаолиятини амалга ошириш мақсадида тайёргарликдан ўтишда айбдор деб топди.

Уларнинг учаласига ҳам ўлим ҳукми ўқилди.

Шон Пиннер ва Эйден Аслин Борис Жонсондан уларни украиналик сиёсатчи ва бизнесмен, «Мухолифат платформаси - Ҳаёт учун» партияси раҳбари Виктор Медведчук билан алмаштиришда ёрдам беришни сўрашганди. Медведчук айни вақтда давлатга хиёнатда гумонланиб ҳибсга олинган.