НАТО тезкор ҳаракат кучлари сонини оширмоқчи

НАТО NRF тезкор ҳаракатланиш кучлари сонини 40 мингдан 300 минг аскаргача оширади. НАТО бош котиби Йенс Столтенберг 27 июнь, душанба куни Мадрид саммити арафасида ташкилот кучлари қайта ташкил этилиши ҳақида маълум қилди. «Биз НАТОнинг тезкор ҳаракат кучларини ўзгартирамиз ва унинг кучини 300 мингдан ортиқ кишига етказамиз», — деди у. 

Россиянинг Украинадаги уруши фонида NRF бир неча ойдан бери жанговар тайёр ҳолатда турибди. Режалаштирилган қайта тузилиш НАТОнинг юқори шайликда кўпроқ кучларга эга бўлиш бўйича янги моделининг бир қисмидир. Бундан ташқари, контингент муайян ҳудудларга боғланган бўлади. Бу, масалан, Германия ҳарбий хизматчиларига Москвадан ҳужум содир бўлган тақдирда Литва қўшинларини қўллаб-қувватлаш учун доимий жойлашиш имконини беради, дея аниқлик киритди Dpa агентлиги. Столтенбергнинг сўзларига кўра, шарқий қанотни ҳимоя қилиш 30 та аъзо давлатга эга альянснинг асосий устувор йўналиши ҳисобланади. 

Йенс Столтенберг Россия Федерацияси билан муносабатлар қайта кўриб чиқилишини тасдиқлади. Альянс бош котибининг сўзларига кўра, саммитда иттифоқчилар «Россия хавфсизлик, қадриятлар ва қоидаларга асосланган халқаро тартиб учун тўғридан тўғри таҳдид экани»ни очиқ маълум қилади. Илгари альянс Москвани «стратегик ҳамкор» сифатида қабул қилган, деб эслатди бош котиб. «Бу биз Мадридда келишиб оладиган стратегик концепцияда бўлмайди», деди Столтенберг. 

Аввалроқ, 25 февраль куни НАТО Шарқий Европа учун мудофаа режаларини фаоллаштирди ва шарқий қанотини мустаҳкамлади. Шу билан бирга, альянс давлатлари етакчилари бу чораларнинг барчаси «огоҳлантирувчи, мутаносиб ва кескинлашувга олиб келмайдиган» бўлишини таъкидлади. 

Испаниянинг El País газетаси манбалари 26 июнь куни хабар беришича, евроатлантика минтақасида юзага келиши мумкин бўлган хавфсизлик таҳдидларига жавоб бериш учун қурол ва қўшинларни ёллаш бўйича «мудофаа ва тийиб туриш» («Defense and deterrence posture») доктринасига тузатишлар киритилиши кутилмоқда. 

Нашр суҳбатдошлари, хусусан, «айрим давлатлар альянс шарқидаги ҳозирги ҳолатдан жанговар гуруҳлар форматида бригадалар тузишга ўтишни исташини» таъкидлади.