БМТ хавфсизлик кенгаши олти давлати Россиянинг Украинадаги фуқаролик объектларига ракета зарбаларини қоралади

БМТ хавфсизлик кенгашига аъзо бўлган олти давлат, шунингдек, Украинанинг доимий вакили қўшма баёнот бериб, унда «Россиянинг 2022 йил 25-27 июнь кунлари Украина ҳудудига, аҳоли турар жойлари ва фуқаролик инфратузилмасига қаратилган ракета зарбаларининг кучайишини кескин қораладилар». 28 июнь, сешанба куни хавфсизлик кенгашининг фавқулодда йиғилиши бошланишидан олдин эълон қилинган ҳужжатда Франция, Ирландия, Норвегия, Буюк Британия, АҚШ ва Албания Россиядан ҳарбий ҳаракатларни зудлик билан тўхтатиб, Украинадан қўшинларини олиб чиқиб кетишни талаб қилди.

Украина президенти Володимир Зеленский 27 июнь куни Кременчукдаги савдо марказига Россия ракета ҳужуми уюштиргани муносабати билан чақирилган хавфсизлик кенгаши йиғилиши иштирокчиларига видео-алоқа орқали мурожаат қилди. У Россияни «кундалик терактлар»ни амалга оширувчи «террорчи давлат»га айланганликда айблаб, мамлакатни БМТдан четлаштиришга чақирди. Зеленский БМТни «рус оккупантларининг Украина тупроғидаги хатти-ҳаракатларини» тергов қилиш ва мамлакатни жавобгарликка тортиш учун халқаро трибунал тузишга чақирди. 

«Биз зудлик билан ҳаракат қилишимиз ва Россияни қотилликлар сериясини тўхтатишга мажбурлаш учун ҳамма нарсани амалга оширишимиз керак», деди Зеленский. У Россиянинг «террорчилик фаолияти» Европа ва Осиёнинг бошқа мамлакатларига, хусусан, Болтиқбўйи давлатлари, Полша, Молдова ва Қозоғистонга ҳам тарқалишидан огоҳлантирди. 

Зеленский Россияни БМТдан чиқариб юборишга чақирар экан, БМТ низомининг 6-моддасига ишора қилди, унда «ушбу низомда кўрсатилган тамойилларни доимий равишда бузган ташкилот аъзоси хавфсизлик кенгашининг тавсияси асосида бош ассамблея томонидан ташкилотдан чиқариб юборилиши мумкин», дейилади. Бироқ, Россияни чиқариб юбориш деярли мумкин эмас, чунки у хавфсизлик кенгашининг доимий аъзоси сифатида ўз вето ҳуқуқидан фойдаланиб, ўзини четлаштиришга қаратилган ҳар қандай уринишларни тўсиб қўйиши мумкин. 

Украина раҳбари ўз нутқи сўнгида залда бўлганларнинг барчасини урушда ҳалок бўлган украиналиклар хотирасига ҳурмат бажо келтириш учун ўрнидан туришни сўради. 

Россия Федерациясининг БМТдаги доимий вакили ўринбосари Дмитрий Полянский Зеленскийга хавфсизлик кенгашида иккинчи марта (аввалги марта у 5 апрелда чиқиш қилган) нутқ сўзлаш имконияти берилганидан норози бўлди. Россия вакили Кременчугдаги савдо марказига Россия томонидан берилган зарбани рад этиб, Россиянинг «аниқ» қуроллари АҚШ ва Европадан келган қурол ва ўқ-дорилар бўлган яқин атрофдаги завод ангарларини нишонга олганини айтди. 

Полтава областининг Кременчуг шаҳридаги «Амстор» савдо марказига ракета тушиши оқибатида 20 киши ҳалок бўлди, 59 киши яраланди, 40 га яқин киши бедарак йўқолди, деб хабар берди Украина президенти девонхонаси.