Метронинг “Қўйлиқ” бекати вақтинча ёпилади

11 июлдан 18 июлгача Ерусти ҳалқа йўли йўналишида поездлар “Дўстлик-2” ва 6-бекат оралиғида қатнайди. 7-бекат (“Қўйлиқ”) бу вақтда автомобил кўприги қурилиши сабаб ишламайди. Метронинг бу йўналишидаги қатнов вақти август ойигача бир соатга қисқартирилиб, соат 23:00 да тўхтатилади.

Тошкент метросининг Ерусти ҳалқа йўли йўналишидаги 7-бекати 11 июлдан 18 июлгача вақтинча хизмат кўрсатмайди.

Бу – Фарғона йўли кўчасидан Қўйлиқ деҳқон бозори томон қурилаётган йўл ўтказгичнинг 7-бекатга яқин қисмида қолип конструкцияларини ўрнатиш ишлари амалга оширилиши билан боғлиқ.

1 ҳафта давомида Ерусти ҳалқа йўли йўналишида поездлар ҳаракати “Дўстлик-2” бекати билан 6-бекат оралиғида ташкил этилади.

2021 йил декабр ойида эълон қилинган йўл ўтказгич лойиҳаси / Фото: Тошкент шаҳар ҳокимлиги

Бундан ташқари, 11 июлдан бошлаб, августга қадар ерусти ҳалқа йўли йўналишида поездлар ҳаракати соат 05:00 дан 23:00 гача амалга оширилади. Метрополитен хабарида бунинг сабабига аниқлик киритилмаган.

“Келтирилган ноқулайликлар учун узр сўраймиз”, дейилади расмий ахборотда.

Аввалроқ об-ҳавонинг иссиқлиги сабабли метро поездларининг ҳаракатланиш тезлиги пасайтирилганди.