«Янги трансферлар бўлмайди». «Реал» ва Бенземани кутаётган эҳтимолий муаммолар

Россиянинг «Чемпионат» сайти колумнисти Михаил Георгиев «Реал» ва Бенземеани кутаётган эҳтимолий муаммолар ҳақида ёзди.

Ҳужумчи Карим Бензема ўтган мавсумни жуда зўр ўтказди, «Реал» ва Франция миллий жамоаси сафида 50 та гол урди. Катта эҳтимол билан Бензема октябрь ойида «Олтин тўп»ни олади. Кейин Каримни Қатарда машаққатли жаҳон чемпионати кутмоқда, у ерда Франция «араваси»ни Килиан Мбаппе билан бирга тортишига тўғри келади.

Бензема декабр ойида 35 ёшга тўлади. Унинг яна бир кучли мавсумни ўтказишига шубҳа қилиш учун жиддий сабаблар бор. Французни катта қийинчиликлар кутмоқда. Айниқса, Мадриддан унинг учун тобора кўпроқ нохуш хабарлар келаётганини ҳисобга олсак.

Мбаппе Каримнинг «Реал»даги шеригига айланмади, клуб раҳбарияти бошқа ҳужумчилар билан шартнома имзоламади ва катта эҳтимол билан, имзоламоқчи ҳам эмас. Ҳужумчи позициясида таркибнинг саёзлиги янги мавсумда жиддий муаммо бўлиши мумкин. Масалан, «Реал»нинг собиқ ҳужумчиси Фернандо Мориентес жамоа ҳужумни кучайтириши шартлигини таъкидламоқда.

«Реал»да фақат битта ҳақиқий ҳужумчи бўлганини эслай олмайман. Одатда икки ёки учта бўлган. Бу ташвишли ҳолат. Винисиус Жуниор ўтган мавсумда Ла Лигада 17 та гол урди, лекин у аслида чап қанот яримҳимоячиси ва ягона ҳақиқий ҳужумчи Карим Бенземадир», - деди Мориентес.

«Реал»да Каримдан бошқа қандай вариантлар бор?

Июн ойида «Реал» президенти Флорентино Перес ҳужумчи сотиб олиш режаси йўқлигини айтган эди. Унинг фикрича, Бензема юқори савияда ўйнашда давом этади. Уни дунёдаги энг яхши «тўққизлик» деб атади ва таркиб етарли даражада шаклланганини таъкидлади.

Аммо кутилмаган воқеалардан ҳеч ким суғурталанмаган. Айниқса, 35 ёшли футболчи учун ноябр-декабр ойларида иқлими иссиқ мамлакатда, ноодатий жадвал асосида ўтказиладиган жаҳон чемпионатидан кейин. Бу ерда нафақат қийин жадвал, эҳтимолий жароҳатлар туфайли ҳам ташвишланиш лозим.

Карло Анчелотти, албатта, ўтган мавсумда бўлгани каби Винисиус Жуниордан ҳам ҳужумчи сифатида тез-тез фойдаланади. Бразилиялик футболчи барча мусобақаларда 22 та гол урди. Агар бундан олдинги мавсумда атиги 6 та гол ургани ҳисобга олинса, жиддий ўсиш.

Мураббий ҳам яқинда шартномаси узайтирилган Родриго Гоеснинг сермаҳсуллигини оширишга ҳаракат қилиши мумкин. Ўтган мавсумда Родриго тўққизта гол урди, янги позицияда унда ўсиш имконияти бор. Лекин ҳар иккала футболчи ҳам соф «тўққизлик» эмас.

Шубҳасиз, «Реал»га яна бир ҳужумчи керак. Ҳозирча мадридликлар ушбу позиция вакилларидан воз кечиш билан овора. Лука Йович «Фиорентина»га текинга берилди. Сербиялик италияликлар сафида ажойиб дебют қилди, «Реал Виченса» (7:0) билан ўртоқлик ўйинида тўртта гол урди – иккинчи бўлимда захирадан майдонга тушди ва покер қайд этди. Ҳа, бу шунчаки жуда кучсиз рақибга қарши ўртоқлик ўйини эди. «Реал» эса жамоада бутунлай муваффақиятсизликка учраган Йовичнинг кетишидан хавотирда бўлмаса керак. Аммо Бенземанинг ўринбосари билан боғлиқ муаммо барибир ҳал қилиниши керак. Агар бошқа вариантлар бўлмаса, Йович хизматидан ҳам қайсидир тарзда фойдаланиш мумкин эди.

Флорентино Перес Мбаппе билан шартнома имзоланишига умид қилган, шунинг учун Эрлинг Ҳоланднинг «Манчестер Сити»га ўтишини хотиржам кузатган. Бозорда ундан ҳам таниқли бўлмаган номлар уни қизиқтирмайди. Жамоадаги соф ҳужумчилар ҳам қадрланмайди. Йович кетди, клубда Бензема ўрнини боса оладиган иккита номинал «тўққизлик» қолди - Мариано Диас ва Борха Майорал. Аммо тез орада бу рўйхат ҳам қисқариши мумкин.

Marca хабарига кўра, Майорал «Реал»ни тарк этишга яқин турибди. Переснинг позицияси шуки, агар кимдир Борха учун 10 миллион евро таклиф қилса, футболчи дарҳол сотилади. Майоралнинг ўзи Мадридда қолишни истайди ва Йовичнинг кетиши ўзини намоён этиш учун сўнгги имконият деб ҳисоблайди. Бироқ бу вазиятда футболчининг фикри инобатга олинмаяпти.

Борха жамоада қолиш учун бош мураббийни кўндириш тажрибасига эга. 2021 йилда Зинедин Зидан унга ишонмаган, аммо барибир олиб қолган эди. Ҳозир эса вазият мураккаброқ. Анчелотти Майоралга ишонч билдирмаяпти ва ноодатий позицияда номинал вингерлар Винисиус ва Родриго хизматидан фойдаланишга кўпроқ мойил. Майоралга «Хетафе», «Сельта» ва А Сериянинг бир қанча клублари қизиқиш билдирмоқда. Трансферга энг яқини «Хетафе».

AS хабарига кўра, Анчелотти Бенземанинг юкини енгиллаштириш учун Эден Азардан алдамчи «тўққизлик» сифатида фойдаланишни ҳам режалаштирганди. Бироқ, мураббий яқинда ўз позициясини ўзгартирди ва агар муносиб таклиф тушса, Азарни сотишга рухсат берди.

Бельгиялик футболчи Анчелотти қўл остида Ла Лиганинг ўтган мавсумида атиги 7 та ўйин ўтказди. Яъни, дастлаб Эденга катта ишонч йўқ эди ва уни алдамчи «тўққизлик» сифатида ўйнатиш варианти мажбурий ва жуда ёмон деб ҳисобланарди. Азар очиғини айтганда, ўз позициясида ҳам порламаётганди. Энди Анчелотти алдамчи «тўққизлик» ғоясидан воз кечди ва клубга Азарнинг хизматларига қизиқмаслигини маълум қилди. Қанот футболчисини АПЛнинг «Челси» ва «Ньюкасл» клубларидан бири сотиб олиши мумкин.

Бу вазиятда «Реал» нима қилади?

Қанчалик ғалати бўлмасин, яна бир қанот яримҳимоячиси билан шартнома имзолаши мумкин. Defensa Central хабарига кўра, Лерой Саненинг агенти Дамир Смолян футболчи хизматини «Реал»га таклиф қилган. «Бавария» вингери «Ливерпул»дан Садио Мане келгач, ўйин амалиётининг камайишидан хавотирда. «Реал» футболчининг агентига трансфер имкониятини ўрганиб чиқишини билдирган.

2020 йилдан бери «Бавария»да ўйнаб келаётган 26 ёшли Сане 89 ўйинда 24 та гол урди ва 27 та голли узатмани амалга оширди. Ёмон эмас, лекин «Реал»га бундай позицияда ўйновчи футболчи керак эмас – агар Винисиус/Родриго жуфтлигидан кимдир қанотни тарк этмаса. Marca ҳам Леройнинг мадридликларга керак эмаслиги ҳақида ёзди. «Реал» фақат футболчиларни (Марко Асенсио, Даниэл Себальос, Азар, Майорал) сотишни мўлжалламоқда. Яқинда Анчелотти ҳам очиқчасига айтди: «Янги трансферлар бўлмайди, бизда ҳаммаси яхши».

Эрлинг Ҳоланд, Килиан Мбаппе, Ромелу Лукаку, Роберт Левандовски ва бозорда мавжуд бўлган бошқа ҳужумчилар қўлдан бой берилди. «Реал» Франциянинг «Реймс» клуби тўпурари Уго Экитикега (Лига 1 ўтган мавсумида 24 та ўйинда 10 та гол) қизиқиш билдираётгани ҳақида хабарлар тарқалди, аммо иш музокараларгача етиб бормади. Футболчини катта эҳтимол билан «ПСЖ» олса керак.

«Реал» Бенземанинг яқин бир неча йил ичида юқори савияда тўп тепишига умид қилмоқда. Унга 19 июл куни (ҳаммадан кеч) таътилдан қайтишига рухсат берилди. Аммо бу унинг мавсумга тайёрлигига жиддий ижобий таъсир кўрсатмаса керак. Демак, ёши катта футболчи кейинги мавсумда ҳаддан ортиқ юкни тортишига тўғри келади, захира ўриндиғи эса, янгиликларга қараганда, фақат қисқаради.

Балки Анчелотти Винисиус ва Родригони супер тўпурар ҳужумчиларга айлантирар, аммо барибир улар классик «тўққизлик» Бензема билан таққосланса, бутунлай бошқача имконият ва кўникмага эга ўйинчилардир. Бундан ташқари, уларга ҳам ўринбосар керак бўлади.