ХКСнинг Россия ва Италиядан бўлган экипаж аъзолари очиқ фазога чиқди

Россиялик космонавт Олег Артемев ва Европа космик агентлиги (ESA) астронавти Саманта Кристофоретти 21 июль, пайшанба куни Халқаро космик станция (ХКС) ташқарисида бир қатор ишларни амалга ошириш учун очиқ фазога чиқди. Улар станция ташқарисида тахминан олти ярим соат вақт давомида бўлиши кутилмоқда. 

Хабар эълон қилинган вақтга келиб, Артемьев ва Кристофоретти Россия университетлари талабалари томонидан «Радиоскаф» илмий-таълим эксперименти дастури бўйича ишлаб чиқилган ўнта кичик космик аппаратни учирди. Бундан ташқари, улар «Поиск» модулига ERA робот-манипулятори учун адаптер ўрнатиши, шунингдек, адаптерлар билан платформани «Поиск»дан «Наука» кўп мақсадли лаборатория модулига ўтказиши керак. 

Артемьев ва Кристофореттидан ташқари, ХКСга 67-узоқ муддатли экспедиция экипажи таркибида россиялик космонавтлар Сергей Корсаков ва Денис Матвеев, шунингдек, апрель ойи охирида келган NASA астронавтлари Челл Линдгрен, Роберт Ҳайнс ҳамда Жессика Уоткинс бор. Артемьев учун бу ХКСга учинчи экспедицияга, Кристофоретти учун эса иккинчисига айланди. 

Июль ойи ўрталарида «Роскосмос» бош директори Дмитрий Рогозин россиялик космонавтларга ERA Европа манипулятори билан ишлашни тўхтатиш ҳақида кўрсатма бериш билан таҳдид қилган эди. Кейинроқ РФ президенти Владимир Путин Рогозинни лавозимидан бўшатиб, унинг ўрнига Юрий Борисовни тайинлади. Манипулятор ҳозирча Россиянинг «Поиск» модулида қолади ва келажакда очиқ фазода ишлашда ёрдам беради.