Гепатит C аниқланган беморлар дорилар билан бепул таъминланади

АОКАда ўтказилган брифингда Санитария-эпидемиологик осойишталик ва жамоат саломатлиги хизмати ахборот хизмати раҳбари Мафтуна Саидова 28 июль – Бутунжаҳон гепатитга қарши курашиш куни муносабати билан мазкур йўналишда кўрилаётган чора-тадбирлар ҳақида маълумот берди.

Жорий йилнинг 1 июлидан бошлаб ҳар йили республика аҳолиси скрининг текширувлари сони 1 миллион нафаргача, полимер занжир реакцияси (ПЗР) текширувлари сони 15 минг нафаргача, вирусли гепатит C тури билан касалланган беморларни даволаш 10 500 нафаргача етказилади. 

Касаллик юқиши хавфи юқори бўлган шахсларни, шу жумладан қон ва унинг таркибий қисмлари билан ишловчи тиббиёт ходимлари орасида гепатит B инфекциясининг олдини олиш мақсадида эмлаш ишлари бошлаб юборилган бўлиб, 2022-2023 йил давомида 120 мингга яқин тиббиёт ходимлари вирусли гепатит В инфекциясига қарши тўлиқ қамраб олиниши режалаштирилган.