Россияда америкалик икки карра олимпия чемпиони 9 йилга озодликдан маҳрум қилинди

Гашиш мойи контрабандасида айбдор деб топилган Бриттни Грайнер АҚШ терма жамоаси таркибида икки карра олимпия ва икки карра жаҳон чемпиони, "Финикс" жамоаси таркибида WNBA чемпиони бўлган.

Фото: REUTERS/Evgenia Novozhenina/Pool

Москва вилояти Химки суди америкалик баскетболчи аёл Бриттни Грайнерни гашиш мойи контрабандаси учун тўққиз йил муддатга умумий тартибдаги колонияда жазо ўташга ҳукм қилди.

У шунингдек, 1 миллион рубл миқдорида жаримага тортилди.

Суд Грайнернинг айбини қисман тан олиши ва спортда эришган ютуқларини юмшатувчи ҳолатлар деб топди.

Прокурор Бриттни Грайнерни 9,5 йилга озодликдан маҳрум қилиш ва 1 миллион рубл миқдорида жаримага тортишни сўраганди.

Грайнер суддаги сўнгги сўзида бу иши хато бўлганини айтди.

Суд ишида унга Аризона штатилик шифокор оғриқ қолдирувчи дори сифатида марихаунани тавсия қилгани маълум бўлди.

Грайнер феврал ойида Нью-Йоркдан "Шереметьево" аэропортига учиб келганида қўлга олинганди. Унинг қўл юки текширувдан ўтказилганида юклари орасидан ўзига хос ҳидли суюқлик топилган – экспертиза унинг гашиш мойи эканлигини аниқлаган.

Грайнер – дунёнинг энг кўп мукофотга эришган баскетболчи аёлларидан бири. У АҚШ терма жамоаси таркибида икки карра олимпия ва икки карра жаҳон чемпиони, "Финикс" жамоаси таркибида WNBA чемпиони бўлган. 2015 йилдан буён Екатеринбургнинг УГМК жамоасида ўйнайди.