Германияда Украинага қурол етказиб берилишига қарши митинг бўлиб ўтди

Россияпараст митинг иштирокчилари Россияга қарши санкцияларни бекор қилишни ва «Шимолий оқим 2»ни ишга туширишни талаб қилди. Бунга параллел равишда Россияга нисбатан сиёсатни юмшатишга қарши намойишлар бўлиб ўтди.

Фото: AP

Кёлнда 4 сентябр, якшанба куни бир неча юзлаб россияпараст намойишчилар Германиянинг Украинага қурол-яроғ етказиб беришига қарши митингга чиқди. Намойишчилар, шунингдек, Россияга қарши санкцияларни бекор қилишни ва «Шимолий оқим 2» газ қувурини ишга туширишни талаб қилди.

Турли манбаларга кўра, митингда 400 нафардан 800 нафаргача одам қатнашган. Тадбирдан олдин эълон қилинган иштирокчилар сони 1000-2000 эди. WDR телекомпаниясининг қайд этишича, намойишчилар Россиянинг Украинага қарши агрессив ҳаракатларини қўллаб-қувватлаб, уларни ўзини ҳимоя қилиш зарурати билан оқлаган. Намойишда Германияда яшовчи русийзабон диаспора вакилларидан ташқари Шимолий Рейн-Вестфалия ва Шарқий Германиядан келган таниқли ўнг экстремистлар ҳам қатнашган.

Митинг ташкилотчилари Донбассдаги Россия томонидан қўллаб-қувватланаётган айирмачи кучлар учун хайрия йиғган, деб ёзади Reuters.

Россияпарастларнинг юришига жавобан Кёлн марказида Россияга нисбатан сиёсатни юмшатишга қарши чиққанлар томонидан қарши намойишлар ўтказилди. ОАВ хабарларига кўра, бу юришлар бир неча юз иштирокчини жамлаган.

Акция содир бўлган ҳудудда полициянинг катта контингенти навбатчилик қилган. Бутилкалар ва петардалар россияпараст митинг иштирокчилари томон отилган. Шу билан бирга, полицияга кўра, намойишлар жиддий ҳодисаларсиз ўтган.