Қирғизистон Тожикистон билан юз берган низо оқибатида етган моддий зарарни 18,4 млн доллар деб баҳолади 

Тожикистон билан тўқнашув оқибатида етказилган дастлабки зарар миқдори 1,5 миллиард сомни (18 млн 466 минг доллар) ташкил этади, деб маълум қилди Қирғизистон хавфсизлик кенгаши котиби Марат Иманкулов. 

Унинг сўзларига кўра, бу миқдор яна ўсиши мумкин. 

«Икки ҳафта давомида Оқ-сув дарёсидаги кўприкни тиклаймиз. Электр узатиш линиялари, уяли алоқа операторлари ретрансляторлари қайта тикланади. Етказилган зарарни аниқлаш бўйича комиссия тузилди. Моддий зарарнинг дастлабки миқдори 1,5 миллиард сомни ташкил этади», — деди у.

Қирғизистон ва Тожикистон ўртасидаги чегарадаги вазият 14 сентябр куни Боткен туманидаги учта участкада чегарачилар ўртасида отишма бошланганидан кейин кескинлашди.

Қирғизистон Бош прокуратураси Тожикистон билан чегарадаги қуролли можародан кейин жиноий иш қўзғатди.