Тошкент вилояти Паркент туманида жойлашган Хўжа маҳалласидаги хонадонлардан биридан мис тангалар топилди, деб хабар бермоқда “Дунё”.
Фанлар академияси Миллий археология маркази, Маданий мерос агентлиги, Археологик тадқиқотларни мувофиқлаштириш ва археология ашёлари давлат каталогини юритиш бошқармаси масъуллари томонидан тангалар сони 939 та экани аниқланди.
Мис тангалар топилган жой кўздан кечирилиб, улар диаметри 115 сантиметр бўлган ўра ер сатҳидан 40-50 сантиметр чуқурликда, бир жойда тўпланган ҳолда топилгани, тангалар топилган жойдаги тупроқ орасидан ўлчами 25х25х5 сантиметр бўлган пишиқ ғишт бўлаги, мовий рангда сирланган ва сирланмаган идишлар майда парчалари топилди.
Тангаларни дастлабки ўрганиш узоқ вақт давомида ер остида, нам тупроққа қоришиб чиригани сабабли улар ҳар иккала томони юзалари текисланиб кетган. Тангалар айримларига ишлов берилиб, тозаланиши уларда доира шаклдаги ҳалқа ва унинг ичига араб ҳарфларидаги ёзув битилгани маълум бўлди.
Тозаланган тангалардан айримлари бир томонида “Зарб Тошкент” ёзувигина ўқилди. Иккинчи томонини ўқиш имкони бўлмаган. Аммо аввал аниқланган, айнан уларга ўхшаш тангалар билан қиёсий таҳлил янги топилган хазина XVI аср охири – XVII аср бошларига тегишли эканини кўрсатган.
Тангалар топилган жойдан аниқланган бошқа ашёвий далиллар - 25х25х5 сантиметр ҳажмдаги пишган ғиштлар, мовий рангдаги сирланган ва сирсиз сопол идиш синиқлари ҳам юқорида кўрсатилган даврга тегишли экани айтилади.
