Хитой – Қирғизистон – Ўзбекистон – Афғонистон транспорт йўлаги бўйлаб биринчи поезд қатнови йўлга қўйилди

«Ўзбекистон темир йўллари» акциядорлик жамияти матбуот хизмати хабарига кўра, айни пайтда 12 дона 40 футлик контейнердан иборат биринчи поезд Ўзбекистон ҳудуди орқали ўтмоқда.

Шунингдек, Ўзбекистон бутун мамлакат бўйлаб ташиш учун 70 фоизлик чегирма бергани маълум бўлди. Бошқа иштирокчи давлатлар томонидан 50 фоизгача бўлган тариф имтиёзлари тақдим этилди.

Юк таркибига озиқ-овқат маҳсулотлари, маиший техника ва халқ хўжалиги эҳтиёжлари учун мўлжалланган маҳсулотлар кирди. Товарлар Хитой томони томонидан контейнерларга шакллантирилган ва Ўш вокзалида (Қирғизистон) контейнерлар Ўзбекистонга тегишли фиттинг платформаларига ортилган. Поезднинг сўнгги манзилига темирйўл орқали етиб келиши икки кундан кейин режалаштирилган.

«Хитой – Қирғизистон – Ўзбекистон – Афғонистон» мултимодал йўлаги бўйлаб юк ташиш Қашқар (Хитой) темирйўл вокзалидан Ўш (Қирғизистон) темирйўл вокзалига автомобил орқали, сўнгра Ўзбекистон орқали темирйўл орқали «Мозори Шариф» (Афғонистон) станциясигача амалга оширилади. 

«Ўзтемирйўлконтейнер» АЖ ушбу йўналиш бўйича Ўзбекистонда бош экспедитор ҳисобланади.