Еврокомиссия Россияга қарши янги санкциялар эълон қилишга тайёрланмоқда

Янги санкциялар пакети нефть нархининг юқори чегарасини ўз ичига олади. Шу билан бирга, мавжуд санкцияларни бироз юмшатиш режалаштирилмоқда, деб хабар берди Politico.

Украинада давом этаётган уруш фонида Еврокомиссия 28 сентябр, чоршанба куни Россияга қарши янги санкциялар, жумладан, нефть нархининг юқори чегарасини жорий этиш бўйича таклифларни эълон қилади. Шу билан бирга, мавжуд санкцияларни юмшатиш кўзда тутилган, дея хабар берди Politico. Куннинг иккинчи ярмида Европа иттифоқи мамлакатлари вакиллари учун брифинг ўтказилиши режалаштирилган. 

Нашрнинг ёзишича, Еврокомиссия Россия нефти нархини чеклаш мақсадида транспорт ва суғурта компаниялари, агар у сотилаётган маълум чегара нархидан ошса, Россия нефтини ташиш ёки суғурталашни тақиқловчи вариантни таклиф қилади. Ушбу чеклов ҳозирда Россия нефти Осиёда сотилаётган нарх билан бир хил бўлади (Европадагидан тахминан 30 фоизга арзон). 

Шу билан бирга, худди шундай санкциялар G7’даги иттифоқчилар, жумладан, танкерларнинг аксарияти суғурталанган Буюк Британия томонидан ҳам жорий этилиши тахмин қилинмоқда. Гап шундаки, агар бу иттифоқчилар нархларни чеклашга расман рози бўлмаса ҳам, Хитой ва Ҳиндистон каби мамлакатларда Россия нефти учун кўпроқ пул тўлашга рағбат бўлмайди, дея тушунтирган Politico. 

Нашрнинг таъкидлашича, нарх чегарасини жорий этиш муаммоси узоқ вақтдан бери Кипр ва Грециянинг қаршилигига учраб келган, уларнинг юк ташиш компаниялари Россия нефтини ташишдан катта даромад олади. Politico хабарига кўра, улар билан дастлабки қарор келишилган, унга кўра улар товон пули олади. 

Шу билан бирга, Европа комиссияси, афтидан, Россия Федерациясига нисбатан жорий қилинган санкцияларни юмшатиш, Россия ўғитлари, цемент ва бошқа маҳсулотларни етказиб беришга қўйилган тақиқни қисман олиб ташлашни таклиф қилади, дея қайд этган Politico. Эслатиб ўтамиз, аввалроқ Россияга қарши саккизинчи санкциялар тўпламида нефть нархи бўйича чекловлар мавжуд эмаслиги хабар қилинганди.