Ўзбекистон миллий жамоасининг собиқ футболчиси Москванинг «Локомотив» клубини бошқаради

Ўзбекистон миллий жамоаси собиқ ҳимоячиси Андрей Фёдоров Россия Премьер-Лигаси клубида иш бошлади. 51 ёшли мутахассис Москванинг «Локомотив» клуби бош мураббийи вазифасини бажарувчи этиб тайинланди.

Фёдоров футболчилик фаолиятида Қўқоннинг «Автомобилист», Фарғонанинг «Нефтчи», Россиянинг «Алания», «Балтика» ва «Рубин» клубларида ўйнаган. «Нефтчи» билан Ўзбекистоннинг 4 карра чемпиони, «Рубин» билан Россия чемпиони бўлган.

Ўзбекистон миллий жамоаси таркибида 63 та ўйинда майдонга тушиб, 6 та гол урган. «Хиросима-1994» Осиё ўйинларининг ғолиби.

Мураббийлик фаолиятида «Рубин» ўринбосарлари, Фарғонанинг «Нефтчи», Тошкентнинг «Локомотив» клубларини бошқарган. 2018 йилда «Локомотив» билан Ўзбекистон чемпиони бўлган.

Сўнгги пайтда «Локомотив Москва»нинг Россия Иккинчи лигасидаги фарм-жамоаси саналмиш «Локомотив-Казанка» клуби бош мураббийи сифатида фаолият юритаётган эди.

Энди Фёдоров «Локомотив» клубини Россия Премьер-Лигаси 13-тури доирасидаги «Торпедо»га қарши ўйинга тайёрлайди.

Маълумот учун, шу вақтгача «Локомотив Москва»га Йозеф Циннбауэр бош мураббийлик қилган эди. «Сочи»га қарши ўйиндаги 0:4 ҳисобидаги мағлубиятдан кейин германиялик мутахассис истеъфога чиқарилди.