Жан-Люк Меланшоннинг сўл партияси нархларнинг ошиши ва ҳукуматнинг иқлим бўйича ҳаракатсизлигига қарши маршга чақирди.
16 октябр, якшанба куни ўн минглаб одамлар Парижда Франция президенти Эммануэл Макрон сиёсатига қарши намойиш ўтказиш учун кўчаларга чиқди. Жан-Люк Меланшоннинг сўл партияси яшаш нархининг ошиши ва ҳукуматнинг иқлим инқирози бўйича ҳаракатсизлигига қарши намойиш ўтказишга чақирди.
Франциянинг BFM TV телеканали ташкилотчиларга таяниб хабар беришича, Франция пойтахти кўчаларига 140 мингга яқин намойишчи чиққан. Полиция маълумотларига кўра, уларнинг сони 30 мингга яқин бўлган.
Франциядаги вазият бир неча кундан бери жуда таранг, дея қайд этади dpa агентлиги. Маошни оширишни талаб қилган нефтни қайта ишлаш заводи ишчиларининг икки ҳафтадан ортиқ давом этган иш ташлаши тобора кучайиб бораётган ёнилғи тақчиллигига олиб келмоқда. Баъзи ёнилғи қуйиш шохобчаларида унинг нархи бир литри учун уч еврога етган.
Расмийлар вазият 2018 ва 2019 йиллардаги «сариқ жилетлилар» норозиликларига ўхшаш намойишларни келтириб чиқариши мумкинлигидан хавотирда, улар эса қисман ёнилғи солиғи ошиши туфайли рўй берган.
