Украина ҳарбийлари беларусларни урушга қўшилмасликка чақирди

Украина Қуролли кучлари (УҚК) қўмондонлиги рус тилида «Беларус Қуролли кучлари аҳолиси ва шахсий таркибига» Россия томонидан қўшни давлатга қарши бошланган урушга қўшилмасликка чақирди. «Сизнинг раҳбариятингиз Россиянинг Украинага қарши қуролли тажовузига қўшилишга тайёрланмоқда, беларус халқини урушга тортмоқчи, уни қон ва ўлимга бўямоқчи», - дейилади 21 октябрь, жума куни Украина Қуролли кучларининг Facebook'даги саҳифасида эълон қилинган видеода.

Мурожаат муаллифлари украинлар ва беларуслар кўп йиллар давомида яхши қўшни бўлиб қолиб, бир-бирини қўллаб-қувватлаб, умумий душманларга қарши курашиб келганини эслатиб ўтган.

Видеода, шунингдек, Украина ҳеч қачон Беларусга таҳдид қилмагани ва Беларус ҳудудидан берилган зарбаларга «ҳеч қачон жавоб қайтармагани» таъкидланган. Лукашенко таҳдидлар ва огоҳлантирувчи ҳаракатларга тайёрлигини эълон қиляпти - бу билан у Беларуснинг Украинага қарши урушга қўшилиши мумкинлигини «яширмоқчи». Ҳужум қилиш буйруғи иттифоқчилар гуруҳи томонидан қабул қилинади, дейилади Украина Қуролли кучлари баёнотида. «Агар Беларус армияси Россия агрессиясини қўллаб-қувватласа, биз жавоб берамиз. Биз Украина ҳудудидаги барча оккупантларга қандай жавоб берган бўлсак, худди шундай қаттиқ жавоб берамиз», - дея огоҳлантиради диктор.

«Путин ва Лукашенконинг амбициялари ва ҳокимиятини йўқотишидан қўрққани туфайли ҳалок бўлган ўғилларингизни, эрларингизни, оталарингизни, ака-укаларингизни дафн этмасликка чақирамиз», — дейилади мурожаатда. Агар беларуслик аскарларни чегарадан мажбуран олиб ўтишса, Украина Қуролли кучлари қўмондонлиги уларга қурол ишлатмаслик ва таслим бўлишни таклиф қилмоқда, кейин «ҳеч ким уларга қарата ўқ отмайди».

Келажакда беларуслар ва украиналиклар яхши муносабатда бўлиб қоладими, бу «Лукашенко ёки Путинга эмас, бу сизнинг ҳар бирингизга боғлиқ», дейилади хабарда.

Украина Ташқи ишлар вазирлиги Беларус ҳукуматининг Беларус ҳудудига режалаштирилган зарба бериш ҳақидаги даъволарини провокация деб атади ва Минскни «Кремлнинг инжиқликларини бажаришни тўхтатишга» чақиради. Шунга қарамай, Александр Лукашенко Россия билан биргаликда қўшинлар гуруҳини жойлаштиришни давом эттирди ва тез орада мамлакатда терроризм таҳдиди кучайганлигини эълон қилди. Беларус КГБ маълумотларига кўра, чегарадаги Малорита шаҳрига ҳужум уюштирилиши кутилмоқда. Европарламент Лукашенкони Украинага қарши урушнинг тўлақонли шериги деб ҳисоблайди.