АҚШ Эронга қарши янги чоралар ҳақида огоҳлантирди

Қўшма Штатлар «Эроннинг ғаразли ҳаракатларига қарши туриш», жумладан, Россияга учувчисиз учиш аппаратлари (УУА) етказиб беришда «санкциялар ва бошқа иқтисодий чоралар доирасидан ташқарига чиқадиган воситалардан» фойдаланишга тайёр. Бу ҳақда 28 октябр, жума куни АҚШ Давлат департаменти расмий вакили Нед Прайс брифингда айтиб ўтди.

«Биз Эроннинг УУА технологиясидан келиб чиқадиган таҳдидга эътиборимизни қаратганмиз ва бу борада қатъий позициядамиз», деди Прайс ва Эрон дронлари Сурия, Ироқда Вашингтоннинг Яқин Шарқдаги ҳамкорларига қарши, энди эса Украинада Россия томонидан жойлаштирилганини қўшимча қилди.

«Биз охир-оқибат ўз манфаатимизга мос келадиган нарсани қиламиз, яъни Эрондан бутун дунё мамлакатлари ва ташкилотларига ушбу технология оқимини тўхтатиш лозим», - дея қўшимча қилди Прайс қандай чоралар ҳақида гапираётганини аниқлаштирмай. «Биз ҳеч нарсани истисно қилмоқчи эмасмиз. Бу зарарли ҳаракатлардан келиб чиқадиган таҳдидни бартараф этиш учун қўлимиздан келган барча ишни қиламиз», - деди Прайс.

Давлат департаменти матбуот котиби АҚШ қарши курашмоқчи бўлган «Эроннинг зарарли ҳаракатлари» қаторида Теҳроннинг террорчилик ташкилотларини қўллаб-қувватлаши, Эрон ядро дастури ва баллистик ракеталарни ишлаб чиқишни ҳам тилга олди.

Июль ойида АҚШ президентининг миллий хавфсизлик бўйича маслаҳатчиси Жейк Салливан Вашингтонда Теҳроннинг Москвага бир неча юзтагача учувчисиз учоқлар етказиб бериш режалари ҳақида маълумот борлигини айтганди.

Октябрь ойида, Россия Украина фуқаролик инфратузилмасини фаол равишда ўққа тута бошлаганида, зарбаларнинг муҳим қисми камикадзе дронлари ёрдамида амалга оширилди. Россия булар «Герань» рус дронлари эканлигини таъкидламоқда, Эрон ҳам учувчисиз учоқлар етказиб берилишини рад этмоқда. Расмий Киев ва НАТО давлатлари аслида дронлар Эроннинг Shahed-136 қурилмаси эканлигини билдиряпти.