Иккинчи МДҲ ўйинлари Беларусда бўлиб ўтади

Бу ҳақда Остонада бўлиб ўтган МДҲ ҳукумат раҳбарлари кенгаши йиғилишида Беларус бош вазири ўринбосари Игор Петришенко маълум қилди.

«II ўйинлар 2023 йил 4-14-август кунларига режалаштирилган. Беларус бу мусобақаларни ўтказишга тўлиқ тайёр, барча зарур спорт ва тегишли инфратузилма бор», деди у.

Игор Петришенко МДҲ давлатларини ушбу мусобақада фаол иштирок этишга чақирди.

Ўйинлар нафақат Минскда, балки мамлакатнинг барча ҳудудларида – ҳар бир вилоят марказида 2 та спорт тури бўйича ўтказилади.

Ўйинларнинг очилиш ва ёпилиш маросимлари Минск-Арена спорт-кўнгилочар мажмуасида ўтказилиши режалаштирилган. Спортчилар жами 21 та спорт тури бўйича беллашади.

МДҲ давлатларининг илк ўйинлари 2021 йил 4-11-сентябрь кунлари Қозон шаҳрида ўтказилди. Мусобақа дастурига спортнинг 16 тури киритилди ва 180 дан ортиқ медаллар тўплами ўйналди. Халқаро тадбирда 14 ёшдан 23 ёшгача бўлган 1,14 минг нафарга яқин спортчи – 9 та МДҲ давлати вакиллари иштирок этди.