Украина разведкаси Путин камида 3 нафар қиёфадошидан фойдаланаётганини айтди, Кремль буни рад этди 

Украина ҳарбий разведкаси бошлиғи, генерал-майор Кирилл Буданов Россия президенти Владимир Путин камида 3 нафар қиёфадошидан фойдаланаётгани ҳақида Буюк Британиянинг Daily Mail нашрига интервью берди. Кейинчалик, унинг сўзларини Украина ҳарбий разведкаси телеграм канали ҳам келтирди. 

Будановнинг айтишича, Путин ўтмишда «қанчалик ёмон бўлмасин», «у аҳмоқ эмас эди», лекин Россия томонидан олиб борилаётган уруш «ҳеч қандай мантиққа тўғри келмайди». 

Буданов қўшимча қилади: «Муҳим савол шундаки, ҳақиқий Путин ҳали ҳам тирикми?»

Украина разведкаси раҳбарининг таъкидлашича, Путин ўзига ўхшаш бўлиш учун пластик жарроҳлик амалиётидан ўтган камида уч нафар қиёфадошидан фойдаланади. 

Буданов сўзларига кўра, илгари Украина разведкаси «ўта махсус ҳолатларда» Путиннинг ўрнини босувчи қиёфадошларни аниқлаган, аммо ҳозир бу «умумий амалиёт»га айланган.  

«Биз унинг ўрнини босаётган уч одам ҳақида аниқ биламиз, аммо қиёфадошларнинг барчаси қанча эканини билмаймиз», деди у. «Улар бир хил кўриниш учун пластик жарроҳлик амалиётини ўтказишган». 

«Уларни фош қилаётган ягона нарса – бўй-басти. Буни видео ва фотосуратда кўриш мумкин. Шунингдек, имо-ишоралар, тана ҳаракати ва қулоқ солинчаки, чунки улар ҳар бир инсонда ўзига хосдир», деди у.  

Буданов Путин касаллик туфайлими ёки ҳокимият учун курашдан кейин ғойиб бўлганми деган саволга жавоб бермади.  

Украина разведкаси раҳбари Кирилл Будановнинг бундай сўзларини Владимир Путиннинг матбуот котиби Дмитрий Песков сафсата деб айтди. 

«Ахир бунга қандай изоҳ бериш мумкин? Ғирт бемаънилик!» - деди Кремль вакили бу ҳақдаги саволга. 

2020 йилда Путин ТАСС агентлигига берган интервюсида 2000-йиллар бошида давлат раҳбари хавфсизлигини таъминлаш учун қиёфадошни жалб қилиш ғояси пайдо бўлганини, бироқ ўзи буни рад этганини айтган эди. 

2021 йилда Песков Путин ўзининг қиёфадошлари ҳақидаги тахминларни билишини ва уларни табассум билан қабул қилишини айтган эди.