Украинадан қишлоқ хўжалиги маҳсулотлари экспорти 21 миллион тоннага етди

Украина ва Европа Иттифоқи ўртасида ўрнатилган темирйўл «бирдамлик линиялари» туфайли 2022 йилнинг май ойи бошидан 20 октябрига қадар Украинадан Европа Иттифоқига 14 миллион тонна қишлоқ хўжалиги маҳсулотлари экспорт қилинди. Бу ҳақда 31 октябр, душанба куни бўлиб ўтган брифингда Еврокомиссия вакили Стефан де Кирсмейкер маълум қилди.

DW саволига жавобан у 2022 йил июль ойи охирида очилган Қора денгиз йўлаги орқали Украинадан экспорт қилинадиган қишлоқ хўжалиги маҳсулотлари ҳажми «дон битими»нинг бутун муддати давомида 7 миллион тоннани ташкил этганига аниқлик киритди. Шундай қилиб, Украинадан жами 21 миллион тонна қишлоқ хўжалиги маҳсулотлари экспорт қилинди. Европа комиссиясининг 20 сентябрдаги маълумотларига кўра, бу кўрсаткич 14 миллион тоннани ташкил қилган.

«Бирдамлик линиялари» - Украина ва Европа Иттифоқи ўртасидаги экспорт ва импорт учун асосий транспорт каналидир, дея таъкидлайди Европа Иттифоқи. 2022 йил май ойидан буён ушбу темирйўл линиялари бўйлаб ташилган хомашё ва товарларнинг умумий ҳажми 29 миллион тоннани ташкил этди. Қишлоқ хўжалиги маҳсулотларидан ташқари, Украинадан пўлат экспорт қилинади, гуманитар ёрдам ва зарур товарлар эса олиб кирилади, деди Стефан де Кирсмейкер.

Россиянинг Украинага кенг кўламли бостириб киришидан кейин халқаро ҳамжамият Киев билан биргаликда Украина товарларини экспорт қилишнинг иккита муқобил йўлини – Европа Иттифоқининг Украина билан «бирдамлик линияси» ва Қора денгиз йўлагини ташкил этишга муваффақ бўлди. Украина ва ЕИ ўртасидаги бирдамлик линиялари май ойида очилган, июль ойида эса Украина портларида юк кемаларини блокдан чиқариш бўйича вақтинчалик келишувга эришилган эди. Европа Комиссиясининг сўнгги маълумотларига кўра, август ойида «бирдамлик линияси» Украинадан (2,6 миллион тонна) қишлоқ хўжалиги экспортининг 61 фоизини, Қора денгиз йўлагидан эса 39 фоизни (1,6 миллион тонна) ташкил этган.

29 октябр куни Россия аннексия қилинган Қримдаги Севастопол ҳарбий-денгиз базасида Россия Қора денгиз флотининг кемалари ва инфратузилмасига ҳужум уюштирилгани муносабати билан «ғалла битими»ни номаълум муддатга тўхтатаётганини эълон қилди. Шу билан бирга, «бирдамлик линиялари» ўз фаолиятини давом эттиради, деб таъкидлади Европа комиссияси. Ушбу транспорт алоқаси ўрта ва узоқ муддатга мўлжалланган бўлиб, унинг иши такомиллаштирилади.