Байден: АҚШ сайловдан кейин ҳам Украинага ёрдам бериши керак

Президент Жо Байден АҚШ Конгрессга оралиқ сайловлардан кейин ҳам Украинага ёрдам беришда давом этишига умид билдирди. У G20 саммитида Украина инқирозининг ечимини муҳокама қилмоқчи.

Фото: AP

АҚШ президенти Жо Байден Конгрессга оралиқ сайловлардан кейин Вашингтон Украинага ёрдам беришда давом этишига умид қилмоқда. Бу ҳақда у 9 ноябрь, чоршанба кунги матбуот анжуманида овоз бериш натижаларини сарҳисоб қилишнинг дастлабки натижаларига изоҳ бериб айтиб ўтди.

Байденнинг қайд этишича, мухолифатдаги Республикачилар партиясининг бу сайловлардаги муваффақияти ҳозирча кутилгандек катта эмас. Демократлар Вакиллар палатаси устидан назоратни йўқотаётганга ўхшайди, бироқ Сенатда кўпчиликни қўлга киритиш имкониятларини сақлаб қолмоқда – ҳаммасини Аризона ва Невада штатларида давом этаётган овозларни санаш ва Жоржияда 6 декабрга белгиланган иккинчи тур ҳал қилади.

Байден «республикачи ҳамкасблари билан ишлашга тайёр» эканини айтди ва «Украинадаги Россия агрессиясига қарши туришда икки партиявий ёндашув» давом этишига умид билдирди. Аввалроқ республикачилар оралиқ сайловларда ғалаба қозонган тақдирда, Киевга ҳарбий ва гуманитар ёрдам қандай етказилиши устидан назоратни кучайтиришга ваъда берган эди.

Россия мудофаа вазирининг Херсондан чекиниш ҳақидаги буйруғини изоҳлар экан, Байден бу Россия армияси учун «катта муаммолар»дан дарак беришини айтди. У, шунингдек, Москва ўз қарорини эълон қилиш учун АҚШдаги «сайлов натижаларини кутгани»ни «қизиқ» деб атади - буни Вашингтон, Байденнинг сўзларига кўра, аллақачон билиб бўлган.

Америка президенти, шунингдек, Индонезиядаги G20 саммитида G20'нинг бошқа аъзолари билан Украинадаги можарони ҳал қилиш йўлларини муҳокама қилмоқчилигини айтди. «Менга Россия президентининг у ерга келиши даргумон эканлигини айтишди. Аммо бошқа иштирокчилар ҳам бўлади», - деди Байден.

#Украина #Жо Байден