Вашингтон Россияга нисбатан санкциялар урушдан кейин ҳам сақланиб қолишини истисно этмади

«Нима бўлганини» инобатга олган ҳолда, Россияга нисбатан айрим санкциялар Украина билан тинчлик келишувидан кейин ҳам ўз кучида қолиши керак, деди АҚШ молия вазири Жанет Еллен.

Фото: Shutterstock

АҚШ молия вазири Жанет Еллен Россиянинг Украинага қарши уруши тугаганидан кейин ҳам унга қарши айрим санкциялар давом этишини истисно этмаяпти.

«Менимча, ҳар қандай турдаги тинчлик битими контекстида санкцияларни ўзгартириш мумкин ва бу ўринли бўлади», деди у 13 ноябрь, якшанба куни чоп этилган The Wall Street Journal газетасига берган интервьюсида. Бироқ, «нима бўлганини ҳисобга олсак», баъзи санкциялар ўз кучида қолиши керак, дея қўшимча қилди у.

Шу билан бирга, Индонезиядаги G20 саммитида бўлган Еллен, «Россия томонидан Украина учун мақбул бўлган ҳар қандай шартларда Украина билан музокара бошлашга уринишлар бўлмаганига» эътибор қаратди.

Украина Қуролли кучлари олдинга силжиб, Украина ҳудудлари озод қилинаётгани ва Россия кучлари чекинаётгани муносабати билан Москва билан тинчлик музокаралари эҳтимоли ҳақидаги мунозаралар кучаймоқда.

Вашингтон тинчлик музокараларини бошлаш қарорини Киев қабул қилиши керак, деб ҳисоблайди. Украина расмийлари Россия ўз ҳудудидан, жумладан аннексия қилинган Қримдан барча қўшинларини олиб чиқмагунча, музокаралар ўтказиш имкониятини рад этмоқда.