Кесилган 105 туп учун 3,5 млрд жарима тўланди. Ишлар шу билан “босди-босди” қилинадими?

Яшнобод тумани Илтифот маҳалласи 29-кўчадаги қурилишда пудратчи ташкилот – “Янги замон бино” МЧЖ томонидан 16 туп дарахт кесиб ташлангани ва табиатга 3,5 млрд сўм зарар етказилгани маълум қилинди. Kun.uz вазиятни ўрганиш мақсадида воқеа жойига борди. Борганимизда ҳудудга ҳеч ким киритилмаётганига гувоҳ бўлдик.

Гувоҳларнинг сўзларига кўра, масъуллар ҳудудга киришга уринган журналистга куч ҳам ишлатишган. Рўй берган ҳолат юзасидан ҳудудда жамоат хавфсизлиги учун жавобгар бўлган профилактика инспектори воқеа жойига чақирилган.

Дарахткушлик бўлган жойга, шунингдек, Яшнобод тумани экология бўлими вакиллари ҳам етиб келишди. Бўлим бошлиғи Беҳруз Қўчқоровнинг айтишича, дарахтларнинг оммавий қирғини 18 ноябрда аниқланган. Ўша куни инспекторлар ҳолатни ўрганиш учун қурилиш объектига киришган, аммо қоровуллар уларга ҳам куч ишлатиб, қурилиш ҳудудидан чиқариб юборишган.

“Бу ерда ўзбошимчалик билан дарахтлар кесиб ташланган. Аслида биз шу йил 27 август куни ҳудуддаги дарахтларни хатловдан ўтказиб кетганмиз. Шундан кейин бу дарахтларга шикаст етказмаслик, ўз вақтида парвариш қилиш, уларни кесиб ташламаслиги учун огоҳлантириш хатларини юборганмиз”, дейди мутасадди.

Кўриниб турибдики, қурилиш жойи баланд тўсиқлар билан ўраб олинган ва бу билан дарахтларни ими-жимида йўқ қилишга қулай шароит яратилган. Ўзи аслида қурувчи – “Янги замон бино” МЧЖда бунга рухсат борми? 136 дона дарахт бор жой тадбиркорга ким томонидан берилган?

Ушбу саволларга жавоб бериши кутилган Яшнобод тумани ҳокимининг уй-жой, коммунал хизмат кўрсатиш ва ободонлаштириш масалалари бўйича ўринбосари Иззатулла Зиёвуддинов Kun.uz мухбири билан телефондаги мулоқотида 10 дақиқада воқеа жойига етиб боришини маълум қилган бўлса-да, сўзининг устидан чиқмади. У билан қайта боғланишга уринишлар эса бемасар кечди.

Эътиборлиси, Ўзбекистонда 2019 йилда президент фармони билан ўрмонлардан ташқаридаги дарахтларни кесишга мораторий жорий этилган. Шу йил январ ойида мораторий муддатсиз даврга узайтирилган.

Шунга қарамай, тадбиркорлар томонидан дарахткушлик тўхтамаяпти.

Яшнободдаги 105 туп дарахт қирғинга учраган қурилиш объектига Олий Мажлис Қонунчилик палатаси депутатлари, Экопартия аъзолари келганига қарамай, пудратчи ташкилот масъуллари уларнинг саволларига жавоб беришни исташмади.

Журналистлар ҳудудни тарк этганидан сўнг, вакиллар у ерга киришга муваффақ бўлишган. Бизга берилган маълумотларга кўра, хатловдан ўтказилган 136 туп дарахтдан 30 тупи ҳам қолмаган. Ҳудудда 105 туп дарахт йўқ қилингани қайд этилган.

20 ноябрь куни Давлат экология қўмитаси раиси Нарзулла Обломурадов, Олий Мажлис Қонунчилик палатаси депутати Расул Кушербоев, Яшнобод тумани ҳокими Бахтиёр Раҳмонқулов, туман прокурори Абдуқодир Донаев ҳамда бошқа мутасаддилар дарахтлар кесилган жойга боришган.

Шу куни прокуратура талаби билан дарахтлар кесиб ташланган ушбу қурилиш майдони ўрнида қурилиш ташкилоти томонидан 200 тупдан зиёд ноёб ва қимматбаҳо манзарали дарахтлар келтирилиб, экилгани айтилмоқда.

Ўзбекистон бош прокурорининг матбуот котиби Ҳаёт Шамсуддинов Яшнободдаги дарахткушлик юзасидан туман прокуратураси томонидан Жиноят кодексининг 198-моддаси 3-қисми (Экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) ва бошқа моддалар билан жиноят иши қўзғатилганини маълум қилди.

Депутат Расул Кушербоевга кўра, туман экология бўлими ходимларига қаршилик кўрсатиб, куч ишлатиш ҳолати бўйича ҳам Жиноят кодексининг 219-моддаси (Ҳокимият вакилига ёки фуқаровий бурчини бажараётган шахсга қаршилик кўрсатиш) билан ҳам жиноят иши қўзғатилиб, дастлабки тергов ҳаракатлари олиб борилмоқда.

Давлат экология қўмитаси дастлабки ҳисоб-китобларга кўра ўсимлик дунёсига 3 млрд 514 млн 200 минг сўм миқдорида зарар етказилганини билдирди. Қонунбузардан ушбу маблағ ундирилгани ҳақида хабарлар тарқалди.

Афтидан шу билан ишлар босди-босди қилинадиганга ўхшайди. Сабаби депутат Расул Кушербоев Телеграм-каналида қонунбузар тадбиркордан қурилиш учун ажратилган ер майдонини давлат захирасига қайтариш чоралари ҳам кўрилиши ҳақида хабар берганди. Ҳозирга келиб ушбу хабар таҳрирланган ва ер майдони давлат захирасига олингани ҳақидаги жумла матндан олиб ташланган.

Маълумот учун, "Янги замон бино" МЧЖ таъсисчилари: "Unique trade business" ҳамда "Ўзбекистон темир йўллари" АЖ бўлиб, бу икки таъсисчининг компанияда 50 фоиздан улуши бор. Қайд этилишича, "Unique trade business" МЧЖ "Golden house development" компаниясига тегишли.