Бугун, 21 ноябрь куни давлатимиз раҳбари Шавкат Мирзиёев Франция президентининг таклифига асосан ушбу мамлакатга ташриф буюрмоқда. Бу — Шавкат Мирзиёевнинг сўнгги тўрт йил ичидаги иккинчи ташрифи бўлади. Қайд этиш жоизки, Ўзбекистон етакчиси бошқа ҳеч бир Европа давлатига бунчалик қисқа вақт ичида икки бор ташриф буюрмаган. Бу эса Ўзбекистон ва Франция ўртасидаги икки томонлама алоқалар тобора кенгайиб, мустаҳкамланиб бораётганини кўрсатади.
Франция – дунёнинг иқтисодий ривожланган етакчи мамлакатларидан биридир (“Катта еттилик” (G7) ва “Катта йигирматалик” (G20) гуруҳларига киради), БМТ Хавфсизлик кенгашининг доимий аъзоси, Европа Иттифоқининг ҳаммуассиси.
Иқтисодиёти бўйича Европада 3-ўринда, жаҳонда 7-ўринда бўлган Франция Европа Иттифоқида етакчи қишлоқ хўжалиги маҳсулотлари ишлаб чиқарувчиси ҳисобланади.
Франция иқтисодиётининг бошқа йирик тармоқлари – машинасозлик (жаҳон ишлаб чиқаришининг 2,7 фоизи), кимё (жаҳон экспортида 4-ўрин), авиакосмик, автомобилсозлик, озиқ-овқат (экспорт ҳажми бўйича АҚШдан кейин 2-ўринда), радиоэлектроника, электротехника, шунингдек, информатика ва кемасозлик. Атом энергетикасини ривожлантириш соҳасида энг илғор мамлакатлардан бири (энергиянинг 75 фоиздан ортиғи АЭСдан олинади).
Ташриф доирасида кўплаб соҳаларга оид келишув ва музокаралардан ташқари маданий тадбирлар ҳам ўтказилиши кўзда тутилган. Париждаги машҳур Лувр музейи ҳамда Араб дунёси институтида юртимиз тарихи ҳамда маданиятига бағишланган иккита йирик кўргазма очилади.
Таъкидлаш жоиз, дунёда юзага келаётган сиёсий ва иқтисодий воқеликда Франция Марказий Осиё давлатлари билан ҳам икки томонлама, ҳам Европа Иттифоқи орқали кўп томонлама форматда ҳамкорликни фаоллаштиришга интилмоқда.
Ўрта муддатли истиқболда Париж Марказий Осиёнинг ўсиб бораётган геосиёсий аҳамиятини ҳисобга олган ҳолда минтақа билан алоқаларни босқичма-босқич мустаҳкамлаш йўналишида ишларни давом эттириш ниятида.
Инвестициялар салмоғи ошмоқда
Ўтган 5 йил давомида Ўзбекистон-Франция муносабатларида барча соҳаларда фаол, очиқ ва ишончли мулоқот кузатилмоқда.
2018 йил октябрь ойида Франция Президенти Эммануэл Макроннинг таклифига биноан Ўзбекистон Раҳбари Францияга расмий ташриф билан борди – Ўзбекистон Раҳбари ташриф буюрган Европадаги биринчи давлат. Натижада 3,4 млрд евролик 11 та битим ҳамда инвестициявий ва савдо шартномалари пакети имзоланди.
Умуман олганда, бугунги кунда томонлар ўртасида мустаҳкам шартномавий-ҳуқуқий база шакллантирилган: жами 50 га яқин турли характердаги ҳужжатлар имзоланган.
