Илон Маск Twitter платформасидаги янгиликларни эълон қилди

Маск компаниянинг Сан-Францискодаги бош қароргоҳида бўлиб ўтган йиғилишда ходимларга «Twitter 2.0» концепцияси доирасидаги ўзгаришлар ҳақида хабар берган.

Маск Twitter фойдаланувчилари «ўз шахсий ҳаёти ҳақидаги маълумотларнинг ошкор бўлишини қайғурмасдан» ва «Twitter тармоғида кимдир уларнинг шахсий ёзишмалари бўйича жосуслик қилиши мумкинлиги ҳақида ўйламасдан» мулоқот қилишини хоҳлашини айтган.

Компания аввалроқ шифрланган хабар алмашиш технологиясини яратишга ҳаракат қилган эди. Энди Маск буни платформа учун устувор вазифа сифатида амалга ошириш ниятида. Шифрланган ёзишмаларни таклиф қилишда етакчи ҳисобланадиган Signal мессенжери яратувчиси Мокси Марлинспайк бу борада компанияга ёрдам беришга тайёрлигини билдирган.

Аввалроқ, Илон Маск янгиланган Twitter Blue обунасини тақдим этган эди. Шундан сўнг, ҳар бир киши ойига $8 эвазига верификацияни англатувчи «кўк белги»ни сотиб олиш имкониятига эга бўлди. Ушбу қарор туфайли платформада кўплаб машҳурларнинг сохта аккаунтлари пайдо бўлди. Шундан сўнг, Twitter пуллик верификацияни вақтинчалик тўхтатишга мажбур бўлди.