«Газпром» Украинани Молдовага бораётган газни олиб қўйишда айблади

«Газпром» Украинани Молдова учун мўлжалланган «Суджа» газ ўлчаш станциясидан (ГЎС) газ олишда айблади ва ёнилғи таъминотини қисқартириш билан таҳдид қилди. Бу ҳақда Россия компаниясининг 22 ноябрь, сешанба куни чоп этилган хабарида айтилади. 

«Газпром» «Молдовагаз» компанияси билан тузилган шартнома бўйича Молдова истеъмолчиларига етказиб бериш учун мўлжалланган Россия газининг Украинада қолиб кетаётганини аниқлагани айтилади. «Газпром» томонидан «Суджа» ГЎСга Украина ҳудуди орқали Молдовага транзит учун етказиб берилаётган газ ҳажми Украинанинг Молдова билан чегарасида узатилган жисмоний ҳажмдан ошади», деб даъво қилмоқда Россия компанияси. «Газпром» маълумотларига кўра, «Украина ҳудудида тўпланган газнинг умумий ҳажми» 52,52 миллион кубометрни ташкил қилади. 

Молдова истеъмолчилари учун Украина орқали транзит номутаносиблиги сақланиб қолса, «Газпром» 28 ноябрдан бошлаб Украина орқали транзит учун «Суджа» ГЎСга газ етказиб беришни кунлик миқдорда қисқартиришни бошлаш билан таҳдид қилди. Расмий Киев ва Кишинёв бу маълумотга ҳозирча изоҳ бермаган.

Уруш бошланганидан бери Европа давлатлари мунтазам равишда Россияни газ таъминотидан шантаж мақсадида фойдаланганликда айблаб келади. Россия томони айбловларни рад этиб, етказиб беришнинг қисқаришини техник сабаблар билан изоҳламоқда. 

1 октябрдан бошлаб «Газпром» Молдовага етказиб берилаётган газнинг кунлик ҳажмини 30 фоизга камайтирди ва етказиб беришнинг камайишини Украина орқали газ транзитини чеклашга боғлиқ техник муаммолар билан изоҳлади. Республика президенти Майя Санду таъминот ҳеч қандай сабабсиз тўхтатилганини айтди. 

«Газпром», шунингдек, 2022 йил давомида Молдовагаз етказиб берилган газ учун тўлов муддати бўйича шартнома шартларини мунтазам равишда бузганлигини, шунингдек, етказиб бериш ҳажми бўйича шартнома мажбуриятларини ўзгартириш учун бир неча бор мурожаат қилганини таъкидлади. Шу муносабат билан Россия монополисти етказиб беришни тўлиқ тўхтатиш ҳуқуқини ўзида сақлаб қолишини айтди.