Интерпол Африканинг энг бой аёлини қидирувга берди

Интерпол Ангола собиқ президентининг қизи Изабел душ Сантушга нисбатан «қизил хабарнома» чиқарди. Бу унинг қидирувга берилганини англатади. 

Изабел ўз мамлакатида турли жиноятларда, жумладан, давлат маблағларини ноқонуний ўзлаштириш, лавозимларни сотиш, пул ювиш ва фирибгарликда айбланмоқда. Хусусан, 2020 йилда Ангола ҳукумати тадбиркор аёл ва унинг эрини миллиард долларлик бюджет маблағларини ўз компаниялари ҳисобига ўтказганликда айблаган. 

Душ Сантуш барча айбловларни рад қиляпти. У айбловларни сиёсий сабаблар билан боғламоқда. 

Илгари Изабел душ Сантуш Африканинг энг бадавлат аёли деб топилган эди. 2020 йилда Forbes унинг бойлигини 1,4 миллиард долларга, 2019 йилда эса 2,3 миллиард долларга баҳолаган. 2021 йилда журнал уни миллиардерлар рўйхатидан олиб ташлади, чунки унинг маблағлари кўплаб айбловлар туфайли музлатиб қўйилди. 

Изабел душ Сантуш Россия фуқаролигига эга. У 1973 йилда Бокуда туғилган, онаси пензалик рус миллатига мансуб аёл. 

Изабелнинг отаси Жозе Эдуарду душ Сантуш 1979 йилдан 2017 йилгача Ангола президенти бўлган. Отаси истеъфога чиққанидан кўп ўтмай у коррупция айбловлари туфайли мамлакатни тарк этган эди.