«Дожд» журналисти Коростелев Латвияда қора рўйхатга киритилди

Россия ҳарбийларига ёрдам бериш ҳақида эфирда гапирган собиқ «Дожд» журналисти Латвия ҳудудига кира олмайди. Ҳозир у Грузияда яшаяпти.

Фото: headtopics.com

Латвия ички ишлар вазири Кристапс Эклонс ишдан бўшатилган «Дожд» телеканали бошловчиси Алексей Коростелевни қора рўйхатга киритди, бу эса унинг Латвияга киришини имконсиз қилади. Бу ҳақда 9 декабрь, жума куни Delfi нашри хабар берди.

Шу тариқа, Эклонс махсус хизматлардан бири - Латвия Давлат хавфсизлик хизматининг тавсиясини кўриб чиқди ва ижобий муносабат билдирди. Энди Коростелевга мамлакатга кириш тақиқланган. Бироқ, у Грузияда яшагани ва Латвия визаси ёки яшаш учун рухсатномага эга эмаслиги сабабли, Латвия ҳукумати уни жиноий жавобгарликка торта олмайди.

1 декабрь куни «Дожд» телеканалининг жонли эфирида Коростелев телеканал рус ҳарбийларига жиҳозлар билан ёрдам бераётганини тушуниш мумкин бўлган иборани айтди. У телеканалдан ишдан бўшатилди, 6 декабрь куни Латвия Миллий электрон ОАВ кенгаши шу ва бошқа қатор қонунбузарликлар туфайли «Дожд» телеканалининг эфирга чиқиш лицензиясини бекор қилди.