Албатта, Мессининг ғалабаси, Мбаппенинг ҳет-триги, Эмилиано ва бошқалар, ҳаммаси финал оқшомининг асосий мавзулари, тўғри, лекин яна шундай бир қаҳрамон борки, унинг меҳнатини эътироф этмаслик мумкин эмас.
Лионел Скалони. Аргентина терма жамоаси мураббийи. Месси 17 йилдан бери футболда, қанча мураббий билан ишлади, аммо айнан Скалони уни чемпионга айлантирди. Футболчиларнинг ажойиб ҳаракатларидан ташқари, Скалонининг бир қатор қарорлари, ишлари бор ва усиз ҳали узоқ давом этадиган кечаги байрам ҳам бўлмасди.
Аввало, икки йил олдинги Бразилиядаги ғалаба – Аргентинанинг бугунги авлодига ўзига бўлган ишончни пайдо қилди. Месси атрофида қандай жамоа қуриш мумкинлигини барчага айнан Скалони кўрсатди, ахир Месси билан ғолиб бўлган аввалги жамоаларда Хави – Иньеста, Неймар – Суарес каби бошқа юлдузлар ҳам бўлганини унутмаслик керак.
Иккинчидан, дастлабки ўйиндаги мағлубият. Мундиалда энг катта босим остида бўлган икки мураббийдан бири (иккинчиси Сантуш) бўлишига қарамасдан, мана шундай омадсиз стартдан кейин ҳам жамоани сақлаб қола билди. Бу осон эмас. Айниқса, юлдуз ва ёш футболчилар қоришмасидан иборат таркибда ажойиб муҳитни сақлаб қолиш, Аргентина тарихидаги энг қийин рақиблардан бири Мексика билан ўйинга тайёрлаш... Умуман, Саудиядан мағлубиятдан сўнг, Аргентинанинг ҳар кейинги ўйини финал мақомида бўлган, жамоанинг ютқазишга ҳаққи йўқ эди.
Учинчидан, Скалони турнир давомида ўз хатоларини ҳам тузатиб борди, футболчиларнинг айнан мундиалдаги қатнашувларига қараб, керакли реакцияларни берди, тузатишларни ўз вақтида амалга оширди. Масалан, асосий бўлиши керак бўлган Лаутаро Мартинеснинг омадсиз ўйинидан кейин эътиборни Алваресга қаратиш, Энцо Фернандес каби мундиалнинг ўзида порлаган футболчини қисқа муддатда муҳим фигурага айлантириш, Ди Мариядан кам, аммо керакли паллаларда фойдаланиш...
Масалан, Ди Мариянинг финалга қайтишини олайлик. Аслида мураббий ҳатто Хорватия, Австралияга қарши ўйинларда ҳам анча эҳтиёткор таркиб тушираётганди. Мбаппе, Дембеле каби тезкор ҳужумчиларга қарши янада риск қилмаслиги ва ҳатто уч ҳимоячи билан ҳам схема танланиши мумкинлиги тахмин қилинганди. Худди Нидерландия билан бўлганидек. Аммо Ди Мариянинг асосийга қўйиш орқали, рақибни эҳтиёткор бўлишга ундаш, ортга қайтишни унча хушламайдиган Мбаппе ва Дембеленинг қанотларидан хавф туғдириш орқали, рақиб ҳужумининг «қўлини боғлаш» режасини ҳатто Дешам ҳам кутмаганди. Скалони Мбаппе ва Дембеленинг устунликларига эмас, камчиликларига урғу берди, устунликларини камайтиришга уриниш ўрнига камчиликларидан фойдаланишни танлади. Айнан ўша нуқталарга зарба берди – дастлабки икки гол айнан шу икки қанотдан содир бўлганини эсланг. Қисқа турнир учун бу қарорлар анча катта ва рискка эга бўлса-да, якунда Скалони уддалади.
