Аргентиналик футболчи навбатдаги интервюсида Барселонага қайтишни исташи, Парижда ўзини яхши ҳис қила олмагани ва миллий жамоадаги келажаги ҳақида гапирди.
«Интер Майами» ҳужумчиси Лионел Месси Sport.es газетасига интервю берди. Суҳбат носталгияга бой бўлган. Аргентиналик футболчи АҚШда ишлари яхшилиги, аммо «Барселона»ни жуда соғинаётгани ҳақида гапирган. Шунингдек, Криштиану Роналду ортидан 2026 йилги жаҳон чемпионатидаги иштироки ҳақида тўхталган.
«Барселонани қаттиқ соғиндим»
Якшанба куни Месси кичик сюрприз қилиб, кутилмаганда Испанияга учиб келди. У «Камп Ноу»га кирди ва бир неча суратга тушди. Унинг келиши дарҳол оқшомнинг энг кўп муҳокама қилинган мавзусига айланди.
Лео шуни тан олган: «Биз Барселонани жуда соғиндик, уйдагилар билан доим шаҳар ҳақидаги хотираларни ёдга оламиз, бу ердаги ҳаёт ҳақида гаплашамиз. Қайтишни орзу қиламиз».
38 ёшли футболчи Испания ҳақидаги ҳар қандай янгилик унда соғинч ҳиссини уйғотишини айтган. Унинг фаолиятидаги энг бахтли лаҳзалар ушбу клуб билан боғлиқ: Гвардиола билан «секстет» ва Луис Энрике билан Чемпионлар лигасидаги ғалаба.
Месси «Барселона»дан кетишидан норози бўлган – унинг тасаввурида барчаси бошқача кечиши керак эди.
«Менда ғалати туйғу қолган. Пандемия туфайли сўнгги мавсумимда мухлислар ўйнашга тўғри келган. Мен бутун фаолиятимни ўша ерда ўтказдим, аммо кетишим орзумдаги каби бўлмади. Европадаги фаолиятимни айнан «Барселона»да якунлайман, шундан кейингина АҚШга кетаман, деб ўйлагандим. Аммо барчаси бошқача кечди – хайрлашув жуда оғир бўлди», – дея қайд этган Месси.
У «Барселона»да ўтган дамлар учун тақдирдан рози эканини қўшимча қилган. Лео ҳозир ҳам кўк-анорранглилар ўйинини кузатишда давом этмоқда, тез-тез дўстлари билан ўйинларни муҳокама қилади.
«Парижда ўзимни яхши ҳис қилмадим»
«ПСЖ»да ўтган йиллардан эса унда ёқимли хотиралар қолмаган – у бу ерда ўзини «ўз тарелкасида ҳис қилмаган».
