Месси «Интер Майами» билан шартномасини узайтирди

MLS чемпионатининг «Интер Майами» клуби ўз расмий сайтида аргентиналик ҳужумчиси Лионел Месси билан шартномани узайтирганини эълон қилди.

38 ёшли футболчи билан янги келишув 2028 йил охиригача амал қилади. Футболчининг аввалги шартномаси 2025 йил охиригача мўлжалланган эди.

«Мен бу ерда қолиб, ушбу лойиҳа устида ишлашда давом этаётганимдан жуда хурсандман. Бу лойиҳа – «Майами Фридом Парк» стадионида ўйнаш нафақат орзум, балки ажойиб реалликка ҳам айланди. Майамига келганимдан бери жуда бахтиёрман, шунинг учун бу ерда ўйнашда давом этишимдан чин дилдан хурсандман», – деган Месси.

Месси «Интер Майами» сафида 2023 йил ёзидан буён тўп суриб келмоқда. Бу вақт ичида ҳужумчи барча мусобақалар доирасида 82 та ўйинда майдонга тушиб, 71 та гол ва 37 та голли узатмага муаллифлик қилган.

«Олтин тўп»нинг саккиз карра ғолиби ва жаҳон чемпиони ушбу жамоа билан Шимолий Американинг Лига Кубоги ва 2024 йилги MLS мунтазам чемпионатида ғолиб чиққан.

Transfermarkt порталида келтирилган маълумотларга кўра, футболчининг бозор нархи 18 млн еврони ташкил этади.

Эслатиб ўтамиз, сўнгги ўн йилликларнинг яна бир юлдузи, олти карра «Олтин тўп» соҳиби, португалиялик Криштиану Роналду ҳам шу йил ёзида Саудия Арабистонининг «Ан-Наср» клуби билан шартномасини узайтирганди. Айни вақтда 40 ёшда бўлган футболчининг янги шартномаси 2027 йил ёзига қадар амал қилади. У шу шартнома эвазига миллардер футболчига айланди.