Дунёнинг энг кўп даромад олувчи спортчи аёллари номи эълон қилинди

Япониялик теннисчи Наоми Осака дунёдаги энг кўп даромад олувчи аёл спортчи деб топилди. Йиллик рейтинг Forbes томонидан тузилган. 

Осака кетма-кет учинчи йил рўйхатда биринчи ўринни эгаллаб турибди. 25 ёшли теннисчи 2022 йилда 51,1 миллион доллар ишлаб топди, бундан 50 миллион доллари спортдан ташқарида. Қайд этилишича, япониялик аёлнинг даромади унинг тадбиркорлик фаолияти орқали келган. 

Рейтингнинг иккинчи ўрнида 2022 йилда 41,3 миллион доллар ишлаб топган теннисчи Серена Уилямс жойлашган. Келиб чиқиши хитойлик бўлган америкалик фристайлчи Эйлин Гу 20,1 миллион доллар билан кучли учликка кирди. 

Осака икки марта US Open турнирида ғолиб чиққан. Япониялик Австралия очиқ чемпионатида ҳам икки марта ғалаба қозонган. 2019 йилда у Аёллар теннис уюшмаси (WTA) рейтингида биринчи ўринни эгаллаб турган эди.