«Ота-оналар болаларини йўқотди. Энди улар қасос олиш учун яшамоқда. Мен шундайларни биламан». Зеленский — «адолатли тинчлик» ҳақида

Украина президенти Володимир Зеленский Оқ уйда АҚШ раҳбари Жо Байден билан учрашувдан кейин қўшма матбуот анжуманида иштирок этди. У Украинанинг «Интер» телеканали мухбирининг президентлар урушнинг «адолатли» якунини қандай кўришлари ҳақидаги саволига жавоб қайтарди.

«Адолатли тинчлик нима дегани? Барча учун ҳар хил. Президент сифатида мен учун адолатли тинчлик - бизнинг ҳудудларимиз бўйича муросасизлик ва барча йўқотишларнинг қоплаб берилишидир. Россия бизга, Европага ва бутун цивилизация дунёсига қарши қилган барча иши учун жавоб бериши керак. 

Фарзандларини йўқотган ота-оналар учун адолатли тинчлик қандай бўлади? Улар учун пул — ҳеч нарса эмас. Улар қасос олиш учун яшайдилар. Ва уруш қанчалик узоқ давом этса, бундай одамлар сони шунчалик кўп бўлади. Уларда яшашда давом этишнинг бошқа маъноси бўлмайди. Бу мен кўраётган нарса. Мен шундай одамларни биламан.

2019 йилда, президент бўлганимда, биз [Владимир] Путинга мессеж юборишга ҳаракат қилгандик. Биз кенг кўламли урушнинг олдини олишни истаганмиз — ва у ҳеч нарса бўлмаслигини айтганди. У алдаганди. Энди биз унга қандай мессежлар жўнатишимиз керак? У ортиқ цивилизация дунёсидаги субъект ҳисобланмайди. У ўз мамлакати маданиятидан қолган нарсаларни сақлаб қолишдан манфаатдор бўлиши керак. Мен яхшиси Жо Байденга мессеж жўнатаман — ундан яна Patriot [ракета қурилмаларини] сўрайман», деган Зеленский.