Украинада 50 миллион долларлик темир рудаси хатловга олинди — бу Алишер Усмоновга алоқадор компанияга тегишли

Украина ҳуқуқ-тартибот идоралари россиялик тадбиркор Алишер Усмоновга алоқадор компанияга тегишли 166 минг тонна темир рудасини мусодара қилди. Бу ҳақда Иқтисодий хавфсизлик бюроси (ИХБ), Бош прокуратура ва Украина хавфсизлик хизмати (УХХ) хабар берди. 

Тергов маълумотларига кўра, компания (номи кўрсатилмаган) Россиянинг Усмоновга алоқадор бошқа корхоналари билан биргаликда 2021 йилдан 2022 йилгача «узилиш транзити» механизмидан фойдаланган ҳолда хомашёни мамлакат ҳудудидан ташиган ва шу орқали божхона тўловларини четлаб ўтган. Украина расмийлари компаниялар фаолиятидан етказилган жами зарарни 118 миллион гривна (тахминан 3,2 миллион доллар) деб баҳоламоқда. ИХБ катта миқдорда солиқ тўлашдан бўйин товлаш бўйича терговга қадар текширув бошлаган. 

Ўз навбатида, УХХ хабар беришича, тахминан 1,8 миллиард гривна (тахминан 48,7 миллион доллар) қийматидаги ҳибсга олинган руда Украинанинг бир нечта портларида топилган, у ердан юк Россияга олиб ўтилиши режалаштирилган. 

ИХБ маълумотларига кўра, ҳибсга олинган мулк Активларни кузатиш ва бошқариш агентлигига (АКБА) ўтказилади. 

Украина расмийлари Россия қўшинлари босиб олинган ҳудудлардан ресурслар, жумладан, донни олиб чиқиб кетаётганини бир неча бор таъкидлаган. Бундан ташқари, июл ойининг иккинчи ярмида «Азовстал»га эгалик қилувчи компания Россияни 600 миллион долларлик пўлатни ноқонуний олиб чиқишда айблади. Кейинчалик маълум бўлишича, руслар Украинадан кунгабоқар уруғини ҳам олиб чиқмоқда. 

Алишер Усмонов Forbes журнали талқини бўйича россиялик энг бойлар рейтингида 7-ўринни эгаллаб турибди. 2022 йил декабр ҳолатига кўра, унинг бойлиги 11,5 миллиард долларга баҳоланган. Европа Иттифоқи Россиянинг Украинага бостириб кириши бошланганидан бир неча кун ўтиб тадбиркорга қарши санкциялар киритди. Март ойида АҚШ ва Буюк Британия ҳам унга қарши санкциялар киритган эди.