Буюк Британия Россиядан суюлтирилган табиий газ импортини тўхтатди

Декабрь ойида Лондон ва Вашингтон Россиядан глобал энергияга қарамликни камайтириш бўйича келишувга эришдилар.

Фото: Reuters

Буюк Британия Россиядан суюлтирилган табиий газ (СТГ) импортини тўхтатди, деб хабар берди мамлакат Ташқи ишлар вазирлиги 1 январь, якшанба куни Twitter'да. Хабарда айтилишича, бу Россиянинг ҳарбий ҳаракатларни молиялаштириш имкониятларини чеклаш мақсадида қилинган.

Лондон 2022 йил октябр ойида Россиядан СТГ сотиб олишни тўхтатганини эълон қилди. 2021 йилда Россиядан газ етказиб бериш мамлакат истеъмол қиладиган ёнилғининг 4 фоизини ташкил этди; СТГ шаклида Буюк Британия умумий газга бўлган эҳтиёжнинг тахминан 17 фоизини олди.

Британия Ташқи ишлар вазирлиги бошқа давлатларга Россия энергия ташувчиларига қарамлигини камайтиришга ҳам ёрдам бериш ниятида эканини қайд этди. 2022 йил декабрь ойида Лондон ва Вашингтон «Россияга глобал энергия қарамлигини камайтириш»га қаратилган янги энергетика ҳамкорлигига киришди.

Шу билан бирга, 29 ноябрь куни Британиянинг The Financial Times (FT) газетаси ЕИ давлатлари Россиядан СТГ етказиб бериш ҳажмини оширганини хабар қилди. Газетанинг ёзишича, жорий йилнинг биринчи ўн ойида ЕИ ўтган йилнинг шу даврига нисбатан Россиядан 42 фоизга кўп СТГ сотиб олган. Ҳаммаси бўлиб 17,8 млрд куб метр СТГ сотиб олинди, деярли бутун ҳажм Франция, Бельгия, Испания ва Нидерландияга мўлжалланган.