Эрдўған Туркияда президент сайлови муддати сурилиши мумкинлигини маълум қилди

Туркия президенти Ражаб Тоййиб Эрдўған мамлакатда президентлик сайлови ўтказиладиган сана кўчирилишини истисно қилмади, деб ёзди Tengrinews «Т24» телеканалига таяниб.

Давлат раҳбари 2023 йилги сайловни «демократик Туркия тарихидаги энг муҳим сайловлардан бири» деб атади. Унинг сўзларига кўра, сайловга тайёргарлик кўриш жараёни узоқ давом этган ва унинг санасини «эҳтимол, бироз кўчиришга» тўғри келиши мумкин.

«Бошқалар ўз ички муаммоларига ўралашиб, вақтини беҳуда ўтказаётган бир пайтда, биз мамлакатимиз ва халқимизга кўрсатиладиган хизматларни батафсил ишлаб чиқдик», деди у.

Туркияда навбатдаги умумий сайловлар - ҳам президентлик, ҳам парламент сайловлари 2023 йил 18 июнга белгиланган. Аввалроқ сайловлар санаси май ойига кўчирилиши мумкинлиги ҳақида айтилаётганди.