«Мақсадга эришилди». РФ мудофаа вазирлиги — Украина бўйлаб навбатдаги ёппа ракета зарбалари ҳақида

Ракеталардан бири Днипрода турар жой биносига тушиши оқибатида камида 27 киши ҳалок бўлган.

EPA / Scanpix / LETA

РФ мудофаа вазирлиги ҳар кунлик брифингида Украина бўйлаб 14 январ куни йўлланган зарбалар чоғида россиялик ҳарбийлар Украина ҳарбий бошқарув тизими ва у билан боғлиқ энергетика объектларини аниқ нишонга олгани ҳақида маълум қилди.

«Белгиланган барча объектлар аниқ нишонга олинди. Зарбадан кўзланган мақсадга эришилди», — деган РФ мудофаа вазирлиги расмий вакили Игорь Конашенков.

Вазирликнинг телеграмдаги саҳифасида жойлаштирилган постда «Заряжаем по полной» («Тўлиқ ўқлаймиз») ёзуви акс этган сурат эълон қилинган.

Ёппасига зарбалар оқибатида, Украина томони маълумотига кўра, мамлакатнинг олти областида энергетика объектлари шикастланган. Днипрода ракета тўққиз қаватли турар жой биносига келиб тушган, натижада 27 киши ҳалок бўлиб, 70 дан ортиқ киши тан жароҳати олган.

«Агентство»нинг ёзишича, 14 январ куни Россия Украина бўйлаб 2022 йил сентябридан буён энг кўп ўлимга сабаб бўлган зарбалар йўллади, ўшанда Запорижжя областида гуманитар карвон ўққа тутилиши оқибатида 32 киши ҳалок бўлганди.