Столтенберг Украинадаги урушда «бурилиш нуқтаси» юз берганини эълон қилди

НАТО бош котиби Йенс Столтенбергнинг айтишича, Давосдаги Жаҳон иқтисодий форумида Украинага оғир танклар ва қурол-яроғлар юбориш бўйича музокаралар ўтказилмоқда. Унинг сўзларига кўра, Киевга танклардан ташқари ҳаво ҳужумидан мудофаа тизимлари, эҳтиёт қисмлар, ўқ-дорилар керак, шунингдек, етказилган қуролларга техник хизмат кўрсатиш зарур. 

Йенс Столтенбергнинг айтишича, ҳозир уруш ҳудудида «бурилиш нуқтаси» кузатилмоқда. Шу сабабли у Украинага ҳарбий таъминотни сезиларли даражада ошириш кераклигини таъкидлади. Унинг фикрича, можарони тинч йўл билан ҳал қилиш истиқболлари Киевга қурол етказиб берилишига боғлиқ. 

«Агар биз эртага можарони тинч йўл билан ҳал қилишни истасак, бугун кўпроқ қурол етказиб беришимиз керак», деди Йенс Столтенберг. 

Шунингдек, 18 январ куни НАТО Ҳарбий қўмитасининг йиғилиши бўлиб ўтди. Унда НАТО бош котиби ўринбосари Мирча Жоанэ алянс мамлакатлари Украинани узоқ муддатли қўллаб-қувватлашга тайёрланиши ва Киевга етказиб бериш учун қурол ишлаб чиқаришни кўпайтириши кераклигини айтди. Бундан ташқари, жаноб Жоане шарқий қанотдаги НАТО жанговар гуруҳлари сонининг кўпайишини эълон қилди. 

2023 йил январдан бошлаб Украинанинг ҳарбий таъминоти билан боғлиқ вазият ўзгарди. 15 январ куни Буюк Британия Украинага Challenger 2 оғир танкларининг биринчи партиясини жўнатишини эълон қилди. Шунингдек, Полша, Финландия ва Дания ҳам Украина Қуролли Кучларига Leopard оғир танкларини топширишга тайёрлигини эълон қилди.