Ўзбекистон ва Қирғизистон ўртасида 1,6 млрд долларлик 50 дан ортиқ ҳужжат имзоланди

Бугун, 26 январь куни Ўзбекистон ва Қирғизистон ўртасида тахминан 1,6 миллиард долларлик 50 дан ортиқ ҳужжатлар тўплами имзоланди. Бу ҳақда ЎзА хабар бермоқда.

Асосий ҳужжатлар:

Агросаноат комплекси соҳасида ҳамкорлик бўйича икки мамлакат қишлоқ хўжалиги вазирлари томонидан имзоланган «Йўл харитаси»;

Жалолобод вилоятида тўқимачилик маҳсулотлари ишлаб чиқаришни ташкил этиш бўйича ҳамкорлик тўғрисидаги битим;

Тери ишлаб чиқариш ва қайта ишлаш соҳасида ҳамкорлик қилиш, шунингдек, Норин вилоятида картошка етиштириш бўйича қишлоқ хўжалиги синфини ташкил этиш тўғрисида келишув;

Картошка етиштириш бўйича агросинф ва чорвачилик комплексини яратиш бўйича ҳамкорлик тўғрисидаги битим;

«Қирғизистон Республикасида карбид ва калций ишлаб чиқариш мажмуасини қуриш» инвестиция лойиҳаси доирасида қўшма ҳамкорлик тўғрисидаги битим. Шартнома суммаси 20 миллион долларни ташкил этади;

Қирғизистон Республикасининг маккажўхори донини Ўзбекистонга етказиб бериш бўйича келишув. Шартнома суммаси 100 миллион долларни ташкил этади;

Қирғизистон Республикасида электр энергиясини ҳисобга олиш ва қурилмаларни йиғишни ташкил этиш бўйича ўзаро англашув ва ҳамкорлик меморандуми;

Базальт тошини қайта ишлаш заводини ишлаб чиқариш бўйича меморандум;

Ўзбекистон компаниялари маҳсулотларини Қирғизистон Республикасида сотиш бўйича ҳамкорлик тўғрисидаги битим;

Қирғизистондан Ўзбекистонга қишлоқ хўжалиги маҳсулотларини етказиб бериш бўйича шартнома.

Умумий қиймати 1,6 млрд доллар бўлган жами 50 дан ортиқ ҳужжат имзоланди, жумладан: 300,3 млн долларлик инвестиция шартномалари; 1 155,6 млн долларлик экспорт шартномалари ва 223,0 млн долларлик импорт шартномалари.