Рус бомбардимончи самолётлари учун ёқилғи Германиядан етказилган — Spiegel

Немис компанияси маҳсулоти Россия ҳарбий самолётларини таъминлаш учун ишлатилган бўлиши мумкин.

Фото: Россия мудофаа вазирлиги

Германиянинг йирик нефт ишлаб чиқарувчиси Wintershell Dea Украинага ҳужум қилган рус бомбардимончи самолётлари учун реактив ёқилғи компонентларини етказиб бергани тахмин қилинмоқда. Бу ҳақда Der Spiegel ёзди.

Журналистларнинг суриштирувига кўра, немислар «Газпром» билан ҳамкорликда ташкил этилган компания орқали Россияга парафин етказиб берган. У авиация ёқилғисини ишлаб чиқаришда ишлатилади. Кейинчалик бу ёқилғи рус бомбардимончи самолётларига қуйилган бўлиши мумкин.

Хусусан, 2022 йил 14 январида Россия томонидан Днепрдаги кўпқаватли турар-жой ва Кременчугдаги савдо марказига ракета ҳужуми уюштирилган. Иккала ҳолатда ҳам Ту-22М3 бомбардимончи самолётлари Шайковка авиабазасидан парвоз қилиб, Х22 синфидаги ракеталар билан зарба берган.

Нашрнинг ёзишича, бу самолётлар айнан Wintershell Dea парафини ёрдамида тайёрланган ёқилғи билан тўлдирилган бўлиши мумкин.

Қайд этилишича, немис компанияси танқидларга қарамай, Россия бозоридаги фаолиятини давом эттириб келаётган эди. Гарчи хорижий ёқилғи компаниялари орасидаги кўплаб рақобатчилари Россиядан чиқиб кетишни афзал кўрган бўлса-да.

17 январ куни Wintershell Dea Россияни тарк этиш ниятини эълон қилди ва буни «Россия энди ишончли иқтисодий шерик эмас»лиги билан изоҳлади. Бироқ журналистлар бу баёнотни Россиянинг 14 январ куни Днепрдаги кўпқаватли бинога ракета ҳужуми билан бевосита боғламоқда.

Шу билан бирга, таъкидланишича, немислар кетганидан кейин ҳам «Газпром» билан ҳамкорликда ташкил этилган қўшма корхона Россияда қолади ва авиакеросин ишлаб чиқишда давом этади. Унинг ускуналари олдинги йилларда «немисларнинг миллиардлаб доллар сармоялари ҳисобига» қурилган.