Европа Иттифоқи ноқонуний муҳожирлардан ҳимояланиш бўйича иккита лойиҳани ишга туширди

Европа Иттифоқи ташқи чегараларни ноқонуний муҳожирлар оқимидан ҳимоя қилиш бўйича иккита пилот лойиҳани ишга туширди, дея маълум қилди Европа комиссияси 20 март, душанба куни.

Бошланган лойиҳалардан бири Болгария ва Туркия ўртасидаги чегарани транспорт воситалари, назорат қилинадиган йўллар, видеокузатув камералари ва кузатув миноралари ёрдамида ҳимоя қилишни ўз ичига олади. Бундан ташқари, лойиҳа доирасида Европа Иттифоқи бошпана бериш ва ноқонуний мигрантларни қайтариш бўйича тезлаштирилган тартибларни ишга туширишни режалаштирмоқда.

Февраль ойида хабар қилинганидек, лойиҳа Европа Иттифоқи маблағлари, Болгариянинг ўзи бюджети ва бошқа Европа Иттифоқи давлатларининг бадаллари ҳисобидан молиялаштирилиши мумкин. «Европа комиссияси Болгарияга унинг Туркия билан ташқи чегарасида назоратни кучайтириш учун молиявий ёрдам беради», — дейилади Европа Иттифоқи баёнотида, унда аниқ рақамлар келтирилмаган.

Февраль ойида бир вақтнинг ўзида эълон қилинган иккинчи лойиҳа аввалроқ, 17 март куни бошланган эди. У Руминияда амалга оширилмоқда ва мигрантларни рўйхатга олиш, бошпана сўровлари бўйича тезроқ қарор қабул қилиш ва рад этилган қочқинларни қайтариш учун янги воситаларни жорий этишни ўз ичига олади.

«Руминия Сербия, Украина ва Молдова билан чегарадош стратегик географик жойлашуви туфайли умумий ташқи чегарамиз хавфсизлигини таъминлашда муҳим роль ўйнайди», — дейилади Европа комиссияси баёнотида.